Ընտանեկան բռնությունների կանխարգելումն օրենսդրորեն կարգավորելու պահը վաղուց էր հասունացել. Սեդա Սողոմոնյան
Վաղուց էր հասունացել ընտանեկան բռնությունների կանխարգելումն օրենսդրորեն կարգավորելու պահը: Այս մասին Փաստաբանների պալատի անդամ Սեդա Սողոմոնյանն ասել է «Կենտրոն» հեռուստաընկերության «Հայկական ուրբաթ» հաղորդման եթերում՝ անդրադառնալով ընտանեկան բռնությունների կանխարգելման և դրանց դեմ պայքարի մասին օրենսդրական նախաձեռնությանը:
«Օրենքի անվանումից արդեն ակնհայտ է, թե որն է կարգավորման առարկան, այն նպատակ է հետապնդում կանխարգելել բռնությունը և ապահովել կնոջ, երեխաների անվտանգությունը: Եթե տղամարդիկ են բռնության ենթարկվում, նրանք ևս ունեն օրենքով սահմանված մեխանիզմներ՝ իրենց իրավունքները պաշտպանելու համար:
Ըստ նրա՝ այս օրենքը վաղուց անհրաժեշտություն է: 2012-16 թթ. վիճակագրական տվյալների համաձայն` ոստիկանություն է դիմել 3750 կին: Ընտանեկան բռնությունները լատենտային հանցագործություններ են, քանի որ շատ դեպքեր կան, որ գտնվում են ստվերում: «Վիճակագրությունը ողջ պատկերը ցույց չի տալիս, քանի որ շատ կանայք` թե՛ օբյեկտիվ, թե՛ սուբյեկտիվ պատճառներով, ուղղակի չեն դիմում պատկան մարմիններին: Մի կողմից վախենում են, որ կզրկվեն ֆինանսական հովանավորից, քանի որ հիմնականում տղամարդիկ են աշխատում, մյուս դեպքում՝ մտածում են՝ եթե դիմենք, ուղղակի տուգանք է հասնելու, ինչից հետո ամուսինս ավելի է զայրանալու և գալու է վրեժխնդիր լինի»:
Փաստաբանը, Հատուկ քննչական կոմիտեի վիճակագրությունը ներկայացնելով, նշել է, որ ՀՀ-ում սպանությունների դեպքերի 47 տոկոսից 17–ը միայն ընտանեկան բռնության արդյունք է:
«Դա ընտանիքի ներսում է, ինչը ոչ թե ընտանեկան, այլ հասարակական աղետ է: Ընտանիքը հասարակության հիմնական բջիջն է և եթե ընտանիքն անառողջ է, մենք չենք կարող ուղղակի ունենալ առողջ հասարակություն»,-ասել է Սեդա Սողոմոնյանը:
Նրա բնորոշմամբ՝ այս օրենքը նախատեսում է մի շարք մեխանիզմներ նախ ընտանեկան բռնությունից տուժած անձանց օգնելու, ապա ընտանեկան բռնությունը կանխարգելելու համար: Ստեղծվելու են հատուկ մեխանիզմներ, պետական մարմիններին տրվելու են նոր գործառույթներ, ստեղծվելու են հատուկ ապաստարաններ, որտեղ բռնության ենթարկվածին կտրամադրվեն համապատասխան ծառայություններ, նրանց հետ կաշխատեն հոգեբաններ, իրավաբաններ: Փաստաբանը նշել է, որ բռնությունները լինում են հոգեբանական, տնտեսական, սեռական, ֆիզիկական:
«Ես՝ որպես կանանց իրավունքների կենտրոնի փաստաբան, կարող եմ փաստել, որ տարվա կտրվածքով մեզ դիմում են հազարավոր կանայք, որոնք ենթարկվում են ֆիզիկական և հոգեբանական բռնության: Կանաց արգելում են առհասարակ տնից դուրս գալ, շփվել իրենց հարազատների հետ, աշխատել, սովորել, ուղղակի երեխաներին հանել զբոսանքի: Բազմիցս նրանց ենթարկում են սեռական բռնության: Մենք ունենք մի կարևոր խնդիր. շատ դեպքերում, երբ կանայք դիմում են ոստիկանություն, նրանց ասում են՝ դե լավ, ամուսինդ է, ոչինչ, ինչ կա այդտեղ»,-տեղեկացրել է Սեդա Սողոմոնյանը:
Նրա խոսքով՝ եթե տանը մարդ պետք է իրեն պաշտպանված զգար, ընդհակառակը՝ այս դեպքում վտանգված է, բռնարարի հետ միևնույն տանն է բնակվում և նրա նկատմամբ բռնությունները կարող են կրկնվել բազմիցս, ու որևէ մեկը չի կարող նրան օգնել: «Ցավալի է, որ մարդ կարող է հասնել մահվան իր իսկ ընտանիքում»,–ասել է փաստաբանը: