2799-ամյա Երևանը՝ երևանցիների աչքերով. Ժպիտները քիչ են, հին ծանոթները՝ չկան, բայց ամենաջերմ է, հարազատն ու բարին. հարցում (տեսանյութ)
Հայաստանի մայրաքաղաք Երևանն այսօր նշում է իր ծննդյան 2799-րդ տարեդարձը: Էրեբունի-Երևանի տոնին` «Երևան՝ սիրո քաղաք» կարգախոսի ներքո տարբեր միջոցառումներ են անցկացվում քաղաքի տարբեր հրապարակներում:
Շարքային երևանցիները և քաղաքի հյուրերը վաղ առավոտից ևս մասնակցում են Երևանի տոնակատարություններին:
Tert.am-ը հարցում անցկացրեց երևանցիների շրջանում, ովքեր միակարծիք են՝ Երևանը ամենաջերմ, հարազատ, բարի քաղաքն է, չնայած ժամանակի կերպարանափոխությանը:
«Ինձ դուր է գալիս Երևանը, իր վարդագույն շենքերով, մի քիչ բարձրահարկ շենքերն են տգեղացնում, բայց նորմալ է: Երևանը շատ հարազատ, սիրուն, ջերմ քաղաք է»,-ասաց հարցվածներից մեկը:
«Գիտեք ինչ կա, հիմիկվա սերնդի համար սա է շատ լավը, անցյալ սերնդի համար անցյալն է լավը, ամեն ինձ փոփոխված է: Միայն վատ է, որ ամեն պատահած տեղ Երևանում շինություններ են, Երևանում էլ տեղ չկա, մի ազատ տեղ գտնես` շենքը երկու օր հետո բարձրանում է: Թող ուշադրություն դարձնեն Գյումրիին, Վանաձորին, բավական է այստեղ: Սիլվա Կապուտիկյանն ասում էր՝ մեծ գլխով փոքր մարդ, Երևանը մեծ գլուխն է»,-ասաց հարցվածներից տարեց մի քաղաքացի, ով չնայած գոհ էր տոնական միջոցառումներից, բայց նկատել էր` մարդիկ ընկճված են, ժպիտները քիչ է, հին ծանոթները չկան, թողել գնացել են:
Մայրաքաղաքն ամեն օր աղբից մաքրող կանայք նշեցին, թե սիրում են Երևանը, բայց դժգոհեցին` քաղաքն այդքան էլ մաքուր չեն պահում:
Հարցվածներից մեկը դժգոհ էր` քաղաքում քիչ են կանաչ տարածքները:
Իսկ մի կին հիշեց անցյալը, երբ ինքն ընդամենը 10 տարեկան էր, թե ինչպես էր Երևանը տոնում իր 2750 ամյակը: «Հիմա էլ վատ չի, բայց էն ժամանակ ուրիշ էր` ձիերով, կառքով, հավեսով, հիմա էլ վատ չի, ինձ քաղաքի փոփոխությունը դուր է գալիս, շատ գեղեցիկ է»,-ասաց նա: