Օլիմպիական չեմպիոն Արթուր Ալեքսանյանը «Միսս Հայաստան» Լիլի Սարգսյանի հետ մասնակցել է մարզման
ՀՀ սպորտի և երիտասարդության հարցերի նախարարության ամենշաբաթյա անվճար մարզումներին մասնակցել են նաև օլիմպիական խաղերի ու աշխարհի չեմպիոն, ըմբիշ Արթուր Ալեքսանյանը և 2017 թվականի «Միսս Հայաստան» Լիլի Սարգսյանը:
Մարզումներն, ինչպես միշտ, անցկացվել են այսօր առավոտյան Կ. Դեմիրճյանի անվան մարզահամերգային համալիրին կից տարածքում:
Հիշեցնենք` 2016 թվականի հոկտեմբերից ՀՀ սպորտի և երիտասարդության հարցերի նախարարությունն անցկացնում է «Կյանքը՝ սպորտի ռիթմով» անվճար առավոտյան մասսայական մարզումներ:
Ծրագիրը նախատեսված է տարիքային բոլոր խմբերի ներկայացուցիչների համար՝ անկախ նրանց մարզումային փորձից և մարզական վիճակից:
ՀԱՕԿ-ի պաշտոնական կայքը հայտնում է, որ Ալեքսանյանը կողքի է հետևել մարզումներին, քանի որ ոչ սպորտային հագուստով է եղել, միայն հասցրել է լուսանկարվել երկրպագուների հետ.
«Հիանալի միտք է: Շատ կարեւոր է, որ մարդիկ շաբաթական մեկ կամ երկու անգամ մարզվեն, առողջ լինեն: Այսօր դիտորդի կարգավիճակում եմ, հաջորդ անգամ գուցե միանամ մարզումներին»,- լրագրողների հետ զրույցում ասել է Արթուր Ալեքսանյանը:
«Կյանքը սպորտի ռիթմով» ծրագրի անվճար մասսայական մարզումները վերսկսվել են: Յուրաքանչյուր շաբաթ օր Կարեն Դեմիրճյանի անվան մարզահամերգային համալիրի բակում առողջ ապրելակերպ է:
Համացանցում արդեն լուսանկարներ են տարածվել առավոտյան մարզումներից.