Տնտեսական աճի մասին տվյալների հիմքում պաշտոնական վիճակագրութունն է, իսկ դա քաղաքական նկարչություն է. տնտեսագետ
Արժույթի միջազգային հիմնադրամի (ԱՄՀ) կանխատեսմամբ այս տարին փակվելու է
3,5% տնտեսական աճով, իսկ մյուս տարին 2,9%, սա այն դեպքում, երբ ֆինանսների նախարար Վարդան Արամյանը վերջերս հայտարարել էր, թե այս տարի նախատեսված 3.2% տնտեսական աճից բարձր ցուցանիշ է լինելու, հավանաբար 4.3%-ի կհասնի։
Տնտեսագետ Մովսես Արիստակեսյանին այս պատկերը չի զարմացնում: Նա Tert.am-ի հետ զրույցում նշեց, թե այս կառավարության վերջին հայտարարություններին ինքը փիլիսոփայորեն է մոտենում:
«Նման բաներ են ասում, որպեսզի երևա, թե ամեն բան լավ է: Դրա արժանահավատությունն ինձ մոտ խիստ կասկածի տեղիք է տալիս, քանի որ դրա հիմքում պաշտոնական վիճակագրության տվյալներն են, իսկ պաշտոնական վիճակագրությունը վերջին 20-24 տարում զբաղված է քաղաքական նկարչությամբ: Իշխանության ներկայացուցիչներն էլ այս քաղաքական խճանկարին գումարում եմ՝ ցանկալին իրականի տեղ ներկայացնելով: Իրենք իրական կյանքի հետ կապ չունեն, ասես այս հասարակության մեջ: Հիշում եք՝ մի հատ վարչապետ ունեիք՝ Տիգրան Սարգսյան, նա էլ ասում էր, որ Հայաստանը դարձնելու է ֆինանսական կենտրոն, նավահանգստի երկիր»,- ասաց Արիստակեսյանը:
Տնտեսագետը շեշտեց՝ պաշտոնական հրապարակված յուրաքանչյուր թվի տակ պետք է ֆիզիկական արժեք, թվային արտահայտություն լինի: Նրա խոսքով, երբ Կառավարությունը խոսում է աճի մասին, ապա այդ աճի տակ գոնե պետք է ավելանա էլեկտրաէներգիայի արտադրությունը, գազի սպառումը և այլ ցուցանիշներ:
«Ինչո՞ւ հենց գազն ու էլեկտրաէներգիան ասացի, որովհետև էլեկտրաէներգիան ու գազը, եթե չկան, ապա արտադրություն էլ չի լինի: Երբ նայում ենք այս թվերին, տեսնում ենք, որ նվազում է ունենում, եթե սա նվազել է, բնականաբար արտադրության աճ չի կարող լինել, թեպետ կա նոր տեխնոլոգիաների քիչ հոսանք ծախսելու համար: Փորձում ենք ծանոթանալ արդյունաբերությանը, շինարարությանը ծավալների թվերի արտադրությանը, սակայն տեսնում ենք, որ անկում կա: Ցույց են տալիս, թե արդյունաբերությունում արժեքային արտահայտությամբ աճ կա, բայց նեղ արտահայտությամբ նայում ենք, տվյալներ չկան»,- ընդգծեց տնտեսագետը:
Հարցին՝ ի վերջո տարին տնտեսական աճի ինչ տոկոսով կփակվի, Մովսես Արիստակեսյանը պատասխանեց, թե թվերի կանխատեսումն անշնորհակալ գործ է: Փոխարենը Մովսես Արիստակեսյանը խոսեց տնտեսական աճի միտումների մասին:
«Ես հստակ կասեմ, որ մենք չունենք տնտեսական աճ և չենք էլ ունենա: Տնտեսության աճը պայմանավորված է դրա սպառող ժողովրդի քանակով: Այդ մարդկանց քանակը քիչ է, մարդիկ հեռանում են, այդքան մարդ չկա, որ սպառեն,եթե սպառման համար մարդ չկա, հետևաբար չեն կարող արտադրել, որ սպառեն: Կարծում եմ՝ անկում կգնա, աճ չկա»,- շեշտեց Մովսես Արիստակեսյանը:
Վերջինս նաև հերքեց, թե գնաճը 1 տոկոս է կազմում և պնդեց՝ կյանքը գնալով թանկանում է: Տնտեսագետի գնահատմամբ՝ վերջին 15 օրվա մեջ առնվազն 10 տոկոս թանկացում է եղել: Մովսես Արիստակեսյանը կարծում է, որ գնաճային ճնշումներն ավելանում են՝ կապված այս պետության արտաքին քաղաքականության կողմնորոշման հետ։
«ԵԱՏՄ-ի անդամ լինելով մեր մաքսատուրքը բարձրանում են 800 տեսակի ապրանքատեսակի համար, այլ երկրներից ներկրումը կդժվարանա և այլն»,- եզրափակեց Մովսես Արիստակեսյանը:
Տ
Movses
N
«Նման բաներ են ասում, որպեսզի երևա, թե ամեն բան լավ է: Դրա արժանահավատությունն ինձ մոտ խիստ կասկածի տեղիք է տալիս, քանի որ դրա հիմքում պաշտոնական վիճակագրության տվյալներն են, իսկ …»: