Թե ԵՄ որ անդամ-պետությունն է հասցրել թարգմանել ՀՀ-ԵՄ համաձայնագիրը, որը՝ ոչ, դա հայկական կողմի գործառույթը չէ. Էդուարդ Շարմազանով
Հայաստան-Եվրամիություն համագործակցության մասին համաձայնագիրը հրապարակվել է երկու կողմերի համաձայնությամբ, նախաստորագրվել է, իսկ նախագահ Սերժ Սարգսյանը ՄԱԿ ամբիոնից հայտարարել է, որ ՀՀ-ն ծրագրում է ստորագրել այն: Tert.am-ի հետ զրույցում այս մասին ասաց Ազգային ժողովի փոխնախագահ, ՀՀԿ խոսնակ Էդուարդ Շարմազանովը՝ խոսելով այն կասկածների մասին, որ փաստաթուղթը կարող է չստորագրվել:
Խորհրդարանի փոխխոսնակը նշեց, որ զգացմունքներով առաջնորդվել պետք չէ, հարկավոր է փաստերով խոսել: Անդրադառնալով ԵԱՏՄ անդամակցության ու ԵՄ համագործակցության համաձայնագրերի միջև անցկացվող համեմատություններին` Էդուարդ Շարմազանովը շեշտեց, որ դրանք տարբեր փաստաթղթեր են և պետք չէ համեմատել: Նա հորդորեց մարդկանց «պրոֆեսորների» տեղ չդնել, առանց կարդալու համաձայնագրի տեքստը` կարծիքներ չհայտնել, միայն վերնագիրը նայելով համեմատություններ չանել ԵԱՏՄ անդամակցության փաստաթղթի հետ:
- Այսօր արդեն մտահոգություններ են հնչում առ այն, որ Հայաստան-Եվրամիություն համագործակցության համաձայնագիրը, որը նախատեսված է ստորագրել նոյեմբերին, կօգտագործվի իշխանության կողմից՝ վարչապետի առաջիկա ընտրության համատեքստում: Ըստ տեսակետների՝ այն կարող է դառնալ Սերժ Սարգսյանի ձեռքում խաղաքարտ` վարչապետի պաշտոնում Սերժ Սարգսյանի առաջադրման հենասյուներից մեկը:
- Չեմ կարծում, որ Ազգային ժողովի նախագահի տեղակալը, իշխող կուսակցության խոսնակը պետք է գնահատականներ տա մամուլի տեսական, երևակայական մտքերին: Մեկ անգամ ևս ուզում եմ ասել, որ նախագահ Սերժ Սարգսյանից բացի որևէ մեկը չի կարող ավելին ասել Հայաստան-Եվրամիություն նախաստորագրված համաձայնագրի մասին, որը հրապարակվել է կողմերի համաձայնությամբ: ՄԱԿ-ի բարձր ամբիոնից պարոն նախագահն ասել է, որ Հայաստանը ծրագրում է ստորագրել այդ համաձայնագիրը: Որևէ մեկը սրանից ավել չի կարող որևէ բան ասել: Ինձ մոտ այնպիսի տպավորություն է, որ որքան մենք մոտենում ենք նոյեմբերին՝ բրյուսելյան գագաթնաժողովին, այնքան տարբեր քաղաքագետներ, տարբեր վերլուծաբաններ, փորձում են իրենց ինֆորմացված ցույց տալ: Փաստաթուղթը նախաստորագրված է, հրապարակված է, նախագահն էլ հայտնել է Հայաստանի դիրքորոշումն այս կապակցությամբ: Մնացածը՝ խնդիրներ կան, չկան, վաղը կլինի, թե մյուս օրը, Կիկոսի մահի ժանրից է, որը ես մեկնաբանել չեմ ուզում:
- Պարո՛ն Շարմազանով, իշխանություններն այս համաձայնագիրը որակում են որպես «և-և»-ի հաջողված քաղաքականության արդյունք: Բայց արդյոք կարելի՞ է այն իր խորությամբ համեմատել ԵԱՏՄ անդամակցության Հայաստանի համաձայնագրի հետ, դնել մեկ նժարի վրա և ասել, որ մենք հաջողել ենք համագործակցել թե՛ Արևմուտքի, թե՛ Եվրազեսի հետ:
- Պետք չէ այդ երկու համաձայնագրերը համեմատել միմյանց հետ: Եվրասիական տնտեսական միությանը Հայաստանի անդամակցության մասին համաձայնագիրն ունի ոլորտային առանձնահատկություններ, ԵԱՏՄ-ն տնտեսական միություն է, տնտեսական ակումբ, որը թույլ է տալիս առանց մաքսատուրքերի առևտուր իրականացնել, իսկ Հայաստան-Եվրամիություն նախաստորագրված այս փաստաթուղթն այլ բան է, սա ժողովրդավարության, մարդու իրավունքների պաշտպանության ու գերակայության, ինստիտուցիոնալ բարեփոխումների շարունակականության ապահովման մասին է: Մարդիկ փորձում են իրենց «պրոֆեսորների» տեղ դնել, առանց կարդալու համաձայնագրի տեքստը` կարծիքներ են հայտնում, վերնագիրը նայում են՝ համեմատություններ են անում ԵԱՏՄ անդամակցության փաստաթղթի հետ: Հայաստանի համար ցանկացած պայմանագիր իր ուրույն տեղն ունի:
- Ձեր ընդդիմախոսները կարծում են, որ համաձայնագրի ստորագրումից հետո իշխանությունները թմբկահարելու են այն մասին, որ հաջողել են «և-և»-ի քաղաքականությունը, այնինչ դա այդպես չէ:
- Իշխանություններին, կներեք, շատ քիչ է հետաքրքրում, թե ինչ են կարծում մեր ընդդիմախոսները: Իշխանություններն ունեն իրենց կարծիքը, քաղաքական օրակարգը, ծրագիրը, պետական շահի գերակայությունը, ժողովրդի կողմից տրված մանդատը՝ քաղաքականություն իրականացնելու համար: Մենք իրականացնում ենք այն քաղաքականությունը, որը եղել է նախագահ Սերժ Սարգսյանի և ՀՀԿ-ի նախընտրական ծրագրում: Իսկ այդ ծրագրում գրված է՝ խորացնել հարաբերությունները Ռուսաստանի հետ, խորացնել հարաբերությունները ՀԱԿՊ-ի և ԵԱՏՄ-ի հետ, քաղաքական երկխոսություն վարել ԵՄ, ԱՄՆ հետ: Մենք անում ենք այն, ինչ ներկայացրել ենք նախընտրական մեր ծրագրում: Իսկ թե քննադատներն ինչ կասեն… Քննադատները քննադատելու համար են, իսկ մենք քննադատությունից չենք վախենում: Մեր ցանկությունն է, օրվա անհրաժեշտությունն է, որ ցանկացած որոշումից շահի պետությունը: Նենց չի, որ գիշերը մենք չենք քնում, որ ընդդիմությունը մեզ գովա կամ չգովա, կամ էլ մենք արդարանանք: Մենք արդարանալու որևէ բան չունենք: Մենք իրականացնում ենք նախընտրական մեր ծրագիրը, որից շահում է պետությունը:
- Դուք չունե՞ք կասկածներ փաստաթղթի ստորագրման վերաբերյալ:
- Ես ուզում եմ նորից կրկնել՝ որևէ մեկը, քան ՀՀ նախագահը, ավելի հստակ ու ավելի դիպուկ չէր կարող տեսակետ հայտնել: Ես փաստերով եմ խոսում, ոչ թե կասկածներով, իսկ փաստն այն է, որ համաձայնագիրը նախաստորագրված է ու Հայաստանը, ինչպես ասել է ՄԱԿ ամբիոնից Սերժ Սարգսյանը, ծրագրում է ստորագրել այն: Թե ոնց կլինի, ինչ կլինի… Կասկածներով ու զգացմունքներով ես չեմ առաջնորդվում:
- ՀՀԿ խմբակցության պատգամավոր, արտաքին հարաբերությունների հանձնաժողովի անդամ Շիրակ Թորոսյանը երեկ Tert.am-ի հետ զրույցում, ըստ էության, հաստատել էր մամուլի հրապարակումներն այն մասին, որ ԵՄ անդամ-պետություններ կան, որոնք չեն հասցրել թարգմանել տեքստը: Նա նշել էր, որ իր տեղեկություններով՝ քայլեր են ձեռնարկվում հարցը կարգավորելու համար: Ձեր կարծիքով՝ կա՞ն արդյոք ԵՄ անդամ-երկրներ, որոնք չեն ուզում, որ այս համաձայնագիրը ստորագրվի և չեն թարգմանում այն, որ գործընթացը ձգձգվի:
- Չեմ կարծում, որ հարգելի պարոն Շիրակ Թորոսյանը տիրապետում է ավելի մեծ ինֆորմացիայի, քան՝ արտաքին գործերի նախարարությունը կամ Ազգային ժողովի փոխնախագահը: Հասցրել են թարգմանել տեքստը, չեն հասցրել թարգմանել՝ դա իմ գործառույթը չէ, հարցրեք ԵՄ գործընկերներին: Մենք նախաստորագրել ենք, համատեղ համաձայնությամբ հրապարակել ենք ու ՄԱԿ ամբիոնից հայտնել ենք, որ ծրագրում ստորագրել այն: Ով է հասցրել թարգմանել, ով՝ ոչ, դա հայկական կողմի գործառույթը չէ: Պարոն Թորոսյանն ասել է դա մամուլի հրապարակումների հիման վրա, ոչ թե ունեցած փաստերի: