Սա կրակոց էր նաև Ժնևյան պայմանավորվածությունների ուղղությամբ. Է. Շարմազանովը` Արցախում ադրբեջանական կրակոցից հայ զինվորի զոհվելու մասին
Հայ-ադրբեջանական սահմանին լարվածության թուլացման մասին հայտարարել է ոչ միայն ՀՀ նախագահ Սերժ Սարգսյան, այլև Ժնևում հայտարարություն է ընդունվել այս մասին: Այսօր ՀՀԿ ԳՄ նիստի ավարտից հետո լրագրողների հետ հանդիպմանը ՀՀԿ խոսնակ, ԱԺ փոխնախագահ Էդուարդ Շարմազանով նման այս կերպ արձագանքեց դիտարկմանը, որ սահմանին զոհ ունենք, այն դեպքում, երբ օրեր առաջ Ալիև-Սարգսյան հանդիպման ժամանակ ՀՀ նախագահը խոստացել էր ամեն բան անել, որ սահմանին լարվածությունը թուլանա: Նա նկատեց, որ սա առաջին համատեղ հայտարարությունն էր, որը ոչ միայն համանախագահների, այլև ՀՀ-ի ու Ադրբեջանի ԱԳ նախարարությունների կողմից:
«Այսինքն՝ ոչ միայն եռակողմ հայտարարությունն էր, այլև եռակողմ + 2: Այսինքն՝ եռանախագահներն՝ ԱՄՆ, ՌԴ, Ֆրանսիա և բանակցող երկու կողմերը՝ ՀՀ և Ադրբեջան փաստում են, որ պետք է իրականացվեն քայլեր` շփման գծում լարվածությունը թուլացնելուն ուղղված: Շփման գծում լարվածությունը թուլացնելը միայն ու միայն այն բովանդակային պայմանավորվածություններն էին , որոնք ձեռք էին բերվել Վիեննայում ու Սանկտ Պետերբուրգում 1 տարի 3 ամիս առաջ: Այսօր այս կրակոցով Ադրբեջանը ցույց տվեց իր խոսքի ու գործի անհամապատասխանությունը»,- ասաց նա:
ՀՀԿ խոսնակի գնահատմամբ՝ այսօրվա միջադեպը ևս մեկ անգամ փաստեց, որ Ադրբեջանը չի հարգում իր իսկ կողմից ընդունված միջազգային պարտավորությունները: Շարմազանովը շեշտեց՝ Ադրբեջանը ցույց է տալիս, որ շարունակում է պատրաստ չլինել կառուցողական բանակցությունների:
«Ադրբեջանը ցույց է տալիս, որ սա կրակոց է, ոչ թե հայկական կողմի վրա, այլ սա կրակոց է Ժնևյան պայմանավորվածությունների նկատմամբ: Կարծում եմ՝ գոնե հիմա արձագանքը պետք լինի միջազգային հանրությունից, այն էլ` ուղիղ ու հստակ»,- շարունակեց Շարմազանովը:
Անդրադառնալով ադրբեջանական կողմից ՀՀ նախագահ Սերժ Սարգսյանին ուղղված մեղադրանքներին, թե չի հարգվում ձեռք բերված պայմանավորվածությունները, Շարմազանովն ասաց, որ ադրբեջանական կողմի հայտարարությունները որևէ աղերս չունեն իրականության հետ և անհեթեթ են:
«Պարոն նախագահը շվեյցարահայ համայնքի հետ հանդիպման ասել է այն, ինչ մենք ասել ենք և՛ Ժնևից առաջ, և ՛Ժնևից հետ, և՛ տաս տարի առաջ, ավելին՝ասելու ենք այնքան ժամանակ, մինչև միջազգային հանրությունը ճանաչի Արցախի անկախությունը: Պարոն նախագահի հայտարարությունը, որ Արցախը երբեք չի լինելու Ադրբեջանի մաս, նորություն չէ, բայց դա ժնևյան բանակցությունների մանրամասների հետ որևէ կապ չունի»,- ընդգծեց Էդուարդ Շարմազանովը:
Վերջինիս գնահատմամբ՝ Ադրբեջան ընկալման խնդիր ունի ու ասելիք չունենալու պատճառով զանազան հայտարարություններ է անում: ԱԺ փոխնախագահը կարծում է, որ Արցախի հիմնախնդրի շուրջ տարվող բանակցությունների համար հստակ քայլեր են անհրաժեշտ՝ Ադրբեջանը կրակելու փոխարեն պետք է լինի կառուցողական.«Եթե ուզում են կողմերն ու համանախագահները լուրջ առաջընթաց ապահովել, բոլորս պետք է գիտակցենք, որ առանց Արցախի աջակցության հնարավոր չէ ակնկալել լուրջ բանակցային առաջընթաց: Առանց Արցախի ժողովրդի ոչ ոք իրավասու չէ որոշել նրա ճակատագիրը»,- նշեց նա:
Ինչ վերաբերում է ամերիկացի նախկին համանախագահի հայտարարություններին, թե պատերազմի լարված իրավիճակ կա հիմա, և կողմերի մոտ էլ չկա համաձայնության ու փոխզիջումների ձգտում, Էդուարդ Շարմազանովն ասաց.«Դիվանագետին հատուկ հավասարության նշան է դրել պարոն Ուորլիքը ու կոռեկտություն է ցուցաբերել, բայց ով– ով պարոն Ուորլիքը շատ լավ գիտի՝ ով է բանակցությունների առաջընթացի իսկական խոչընդոտողը: Այսօրվա կրակոցով Ադրբեջանը ցույց տվեց, որ պատրաստ չէ կառուցողական բանակցությունների»:
Լրագրողների մի շարք հարցադրումներին ի պատասխան՝ ԱԺ փոխնախագահն հայտարարեց, որ ՀՀ-ն որևէ նոր փաստաթուղթ Արցախի հակամարտության բանակցությունների շուրջ չի քննարկում:
«Իսկ ժնևյան հանդիպման դրական կետն այն է եղել, որ հանդիպելն ավելի լավ է, քան չհանդիպելը: Արձանագրվեց ոչ միայն Վիեննայի և Սանկտ Պետերբուրգի պայմանավորվածությունների իրացում, այլև դրանց միացավ Ադրբեջանը, իսկ հիմա նա փորձում է հետ կանգնել այդ պայմանավորվածություններից այդ կրակոցով: Այս կրակոցը ոչ միայն հայաստանյան ու արցախյան կողմերի դեմ էր, նաև այն հայտարարության դեմ էր, որին միացել է Ադրբեջանը: Սա իմ մասնավոր կարծիքն է»,-եզրափակեց Էդուարդ Շարմազանովը: