Aston Martin-ը շքեղ դասի բնակելի համալիր կկառուցի Մայամիում
Բրիտանական Aston Martin ընկերությունը G&G Business Developments շինընկերության հետ միասին սեփական ծրագրով բնակելի շենք կկառուցի Մայամիում:
Ինչպես հայտնում է Motor.ru-ն, 66 հարկանի լյուքս դասի շենքի կառուցումը կավարտվի 2021 թվականին: Դա կլինի ապրանքանիշի առաջին նախագիծն անշարժ գույքի և ինտերիերի դիզայնի ոլորտում:
Aston Martin Residences ծրագրի իրագործման աշխատանքները կղեկավարի բրիտանական ավտոարտադրողի գլխավոր դիզայներ Մարեկ Ռեյհմանը: Շենքի յուրահատկությունները կդառնան ընդունարանի տաղավարները, դռները՝ հատուկ բռնակներով, հատուկ շրիշակները և դռների կաշվե մասերը:
Գնորդների համար հասանելի կլինեն 391 բնակարան, այդ թվում՝ 7 պենտհաուս և մեկ դուպլեքս, որոնցից յուրաքանչյուրն անհատական լողավազանով: 52-55-րդ հարկերի միջև տեղակայված կլինի ժամանցային գոտին: Այն կներառի նաև ֆիթնես կենտրոնը, բռնցքամարտի սրահը, գոլֆի վիրտուալ դաշտ, պատկերասրահ և երկու կինոթատրոն:
Այս համալիրի բնակարանների արժեքը կտատանվի 600 000-50 մլն դոլարի սահմանում: