Նոր մանրամասներ են բացահայտվել «պանամական դոսյեի» շուրջ հետաքննություն անցկացնող լրագրողուհու սպանությունից (տեսանյութ)
Մալթացի հայտնի լրագրողուհի Դաֆնե Կարուանա Գալիցիայի մեքենայում պայթած ռումբն, ամենայն հավանականությամբ, գործարկվել է հեռակառավարմամբ:
Ինչպես հաղորդում է Lenta.ru-ն՝ վկայակոչելով մալթիական աղբյուրը, քննիչները պարզել են, որ ռումբը պայթել է սարքին ամրացված բջջային հեռախոսին եկած զանգից հետո: Նրանք հույս ունեն, որ կկարողանան պարզել, թե որտեղ է կատարվել զանգը և դուրս գալ հանցագործի հետքի վրա:
Հայտնի է նաև, որ սարքը 500 գրամ սեմտեքս տեսակի հզոր պայթուցիկ նյութ է պարունակել, որն արտադրվել է Չեխիայում 1960-ականներին:
Բացի այդ, մեքենայում հայտնաբերվել է լրագրողուհու նոթբուքը: Այն պայթյունի ժամանակ վնասվել է, սակայն մասնագետները հույս ունեն դրանից որևէ տվյալ կամ տեղեկություն ստանալ, որը կօգնի սպանության հետաքննությանը:
Հիշեցնենք, որ Դաֆնեն զոհվել է հոկտեմբերի 16-ին: Նա զբաղվել է պանամական օֆշորային սկանդալի և կղզու իշխանությունների ներգրավվածության հետաքննությամբ: Նրա վերջին հետաքննության արդյունքում բացահայտվել էր Մալթայի վարչապետ Ջոզեֆ Մուսկատի կապը օֆշորային սկանդալին և Ադրբեջանի ղեկավարությունից գումար ստանալու հանգամանքը: