ԵՄ երկրների առաջնորդները հաստատել են Իրանի հետ միջուկային գործարքի շուրջ ստանձնած պարտավորությունները
Եվրամիության անդամ երկրների առաջնորդները հաստատել են Իրանի միջուկային համաձայնագրով ստանձնած պարտավորությունները և հավանության արժանացրել ավելի վաղ ԵՄ երկրների արտգործնախարարների հայտարարությունը: Այդ մասին ասված է ԵՄ վեհաժողովի հայտարարությունում, գրում է «ՌԻԱ Նովոստի»-ն:
«Եվրոպական խորհուրդը հաստատում է իրանական միջուկային պայմանավորվածությունների վերաբերյալ իր պարտավորությունները և աջակցում հոկտեմբերի 16-ին արտաքին գործերի խորհրդի կողմից արված հայտարարությանը»,- ասված է վեհաժողովի ժամանակ քննարկման արդյունքներով ընդունված փաստաթղթում:
Երկուշաբթի նախարարները հայտարարություն էին ընդունել, որով կոչ են արել ԱՄՆ-ին պահպանել Իրանի միջուկային ծրագրի մասին համաձայնագիրը: ԵՄ-ն կոչ է արել ԱՄՆ-ին պահպանել Գործողությունների համատեղ համապարփակ ծրագրին հանձնառությունը և գնահատել հետևանքներն ԱՄՆ-ի, իր գործընկերների և տարածաշրջանի անվտանգության համար՝ նախքան հետագա քայլերի ձեռնարկումը:
Ինչպես ավելի վաղ հայտնել էր Tert.am-ը, Միացյալ Նահանգների նախագահ Դոնալդ Թրամփն իր ելույթում կրկին քննադատել էր Իրանի հետ կնքված միջուկային համաձայնագիրը: Թրամփը խոստացել է հավելյալ պատժամիջոցներ սահմանել Իրանի դեմ՝ այդ երկրին մեղադրելով ահաբեկչությանն աջակցելու համար: Դոնալդ Թրամփի կարծիքով՝ նախկին նախագահ Բարաք Օբամայի օրոք կնքված համաձայնագիրն անհաջող է ու չի բխում Միացյալ Նահանգների շահերից:
Մինչդեռ Իրանի արտաքին քաղաքական գերատեսչության ղեկավար Մոհամադ Ջավադ Զարիֆը հայտարարել է, որ Թեհրանը դուրս կգա պատմական միջուկային համաձայնագրից, եթե միջազգային հանրության անդամները փորձեն վերականգնել Իրանի դեմ պատժամիջոցները: