ԱՄՀ-ի վերլուծությունները կատարվում են մինչև մայիս-հունիս ամիսները. Վ. Արամյանը՝ տնտեսական աճի վերաբերյալ իրենց և ԱՄՀ-ի կանխատեսումների տարբերության մասին
Արժույթի միջազգային հիմնադրամի (ԱՄՀ) կանխատեսմամբ՝ այս տարին փակվելու է 3,5% տնտեսական աճով, իսկ մյուս տարին 2,9%, սա այն դեպքում, երբ ֆինանսների նախարար Վարդան Արամյանը վերջերս հայտարարել էր, թե այս տարի նախատեսված 3.2% տնտեսական աճից բարձր ցուցանիշ է լինելու, հավանաբար 4.3%-ի կհասնի:
Սակայն ՀՀ ֆինանսների նախարար Վարդան Արամյանը, պատասխանելով Tert.am-ի հարցին, որ ստացվում է՝ Արժույթի միջազգային հիմնադրամը հրապարակած զեկույցում կասկածի տակ դրել Հայաստանում այս տարի 4.3 տոկոս տնտեսական աճ գրանցելն, ասաց.«Մենք, ի դեպ, պետք է հիշենք, որ այդ ճշգրտումը կատարվել է օգոստոս-սեպտեմբեր ամիսներին, որովհետև նոր տեղեկատվություն ունենք, տնտեսական նոր զարգացումներ, որ մեզ հիմք են տալիս ենթադրելու, որ տարին մենք կավարտենք ոչ թե 3.2 տոկոսով, որը շատ մոտ է Արժույթի միջազգային հիմնադրամի կանխատեսումներին, այլ կավարտենք 4.3 տոկոսով»:
Ֆինանսների նախարարը նաև բացատրություն ունի, թե ինչով է պայմանավորված ՀՀ կառավարության և Արժույթի միջազգային հիմնադրամի ՀՀ տնտեսական աճի վերաբերյալ կանխատեսումների տարբերությունը: Նա նկատեց, որ ԱՄՀ-ն վերլուծությունները և կանխատեսումները կատարվում են մինչև մայիս-հունիս ամիսները, որից հետո գնում են ամփոփումները:
«Արժույթի միջազգային հիմնադրամի համաշխարհային տնտեսական հեռանկարներում սովորաբար տեղ գտած տեղեկատվությունները, վերլուծությունները և կանխատեսումները կատարվում են մինչև մայիս-հունիս ամիսները, որից հետո գնում են ամփոփումները, այսինքն՝ այնտեղ կա որոշակի ժամանակային մաս, որ այդ տեղեկատվությունը ներառված չէ, սովորաբար ԱՄՀ-ն իր վարքագծով կոնսերվատիվ է, պահպանողական՝ տարբեր երկրների տնտեսական աճերի կանխատեսումների մասով: Հոկտեմբերին, եթե վերցնենք ապրիլի կանխատեսումը, կտեսնենք, որ շատ մեծ ճշգրտումներ չկան, նա կտրուկ չի անում այդ կանխատեսումները»,-շարունակեց Վարդան Արամյանը:
Հիշեցնենք, որ Արժույթի միջազգային հիմնադրամի կողմից հրապարակված զեկույցի համաձայն՝2017թ. Հայաստանի համար կարելի է կանխատեսել հազիվ 3.5 տոկոս աճ, իսկ 2018թ.՝ 2.9 տոկոս աճ: Փոխարենը ՀՀ ֆինանսների նախարար Վարդան Արամյանն հայտարարել էր. «Մենք պատրաստվում ենք վերանայել տնտեսական աճի հիմքերը 2017 թվականի համար և 3.2-ի փոխարեն սահմանել իրական տնտեսական աճի 4.3 տոկոսանոց ցուցանիշ այս տարվա համար»: