Համատեղ հանդիպումներ եղել են, հարցի շուրջ քննարկումները շարունակվելու են. Թաղահի Նեժաթին՝ Իրանից Հայաստան գազ արտահանելու մասին
Հայաստանն ու Իրանը բազմաթիվ անգամներ համագործակցել են, ունեն երկուստեք հետաքրքրություններ, քանի որ 2 պետությունների հարաբերությունները շատ խորն են: Այսօր ՀՀ ՊԵԿ նախագահ Վարդան Հարությունյանի հետ հանդիպումից հետո լրագրողների հետ զրույցում նման հայտարարությունն արեց Իրանի Իսլամական Հանրապետության ազգային հարկային ծառայության նախագահ, ֆինանսների և էկոնոմիկայի փոխնախարար Թաղահի Նեժաթին: Նա արձանագրեց, որ երկու երկրների միջև կայացել է 14 միջկառավարական հանձնաժողովի նիստ, որոնց շեշտադրումները եղել են երկրների միջև տնտեսական հարաբերությունները զարգացնելը:
«Վերջերս ՀՀ մեծարգո վարչապետի՝ Իրան կատարած այցի շրջանակում երկուստեք հետաքրքրվող հարցերը քննարկվեցին: Այդ այցի շրջանակում քննարկվել են բոլոր խնդիրներն ու խոչընդոտները, որոնք առկա են 2 երկրների մաքսային ու հարկային դաշտում, իսկ կողմերը պատրաստակամություն են հայտնել լուծումներ գտնելու համար»,- շարունակեց նա:
Թաղահի Նեժաթիի խոսքով՝ այսօր արդեն քննարկվել են 2 երկրների գործարարների ու ներդրողների համար հարկային ու մաքսային դաշտի դյուրացման օրենսդրությունը: Նրա գնահատմամբ՝ դյուրացման հետևանքով 2 երկրների միջև հնարավոր կլինի զարգացնել տնտեսական հարաբերությունները:
«Ինչ վերաբերում է երկու երկրների միջև կրկնակի գանձումից խուսափելուն, ապա նշեմ, որ համաձայնագիրը ստորագրվել է: Համաձայնություն է ձեռք բերվել, որ ստեղծվի համատեղ աշխատանքային կոմիտե, որը կուսումնասիրի գոյություն ունեցող բոլոր խոչընդոտները, որոնք կխանգարեն համաձայնագրի իրացմանը: Աշխատանքային կոմիտեն վեր կհանի խնդիրները, որպեսզի լուծում տրվի դրանց»,- ասաց Նեժաթին:
Դիտարկմանը, որ Իրան-ԵԱՏՄ ազատ առևտրի համաձայնագրի աշխատանքները մոտենում են ավարտին, իսկ դրանցում նաև ընդգրկված են նաև հայկական 40 ապրանքատեսակներ, որոնց համար կանխատեսվում են ինչպես ընթացակարգերի, այնպես էլ սակագների պարզեցումներ, միջինում որքա՞ն կիջնեն մաքսատուրքերն ու իրանական ո՞ր ապրանքները ավելի հեշտացված կմտնեն ԵԱՏՄ շուկա, Թաղահի Նեժաթին պատասխանեց. «Բանակցություններն ընթացքի մեջ են: Վստահ եմ՝ տեղյակ եք, որ նոյեմբեր–դեկտեմբեր ամիսներին 15-րդ միջկառավարական հանձնաժողովի նիստ է կայանալու, այս հարցին, անպայման, կանդրադառնանք այդ նիստին»:
Հարցին՝ Իրանից Հայաստան գազի ներմուծումը շահեկան չէ՞, հաշվի առնելով, որ ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանն ասաց, թե այս պահին իրանական գազը ռուսականից էժան չէ, Թաղահի Նեժաթին պատասխանեց.«Այս հարցով համատեղ հանդիպումներ եղել են, հարցի շուրջ քննարկումները թերևս շարունակվելու են, և այդ հանդիպումներ ընթացքում այս հարցի շուրջ համաձայնություններ ձեռք կբերվեն»: