Ըստ Արգամ Աբրահամյանի՝ ոչինչ չի խանգարում, որ Հովիկ Աբրահամյանը պաշտոնի նշանակվի
Նախկին վարչապետ Հովիկ Աբրահամյանի որդին՝ ԱԺ «Ծառուկյան» խմբակցության պատգամավոր Արգամ Աբրահամյանը հավաստիացնում է, որ իրենց ընտանեկան բիզնեսներին վտանգ չի սպառնում ու չի սպառնացել: Լրագրողների հետ զրույցում Արգամ Աբրահամյանն ասաց, որ իրենց ընտանեկան բիզնեսը երկրից չեն հանում:
Հարցին, թե անցե՞լ է այդ վտանգը, նա պատասխանեց. «Վտանգ չի էլ եղել, որ անցնի»:
Հարցին՝ ճի՞շտ են այն լուրերը, որ Հովիկ Աբրահամյանը հանդիպել է նախկին վարչապետ Տիգրան Սարգսյանի հետ, Արգամ Աբրահամյանն այսպես պատասխանեց. «Ես տեղյակ չեմ, բայց հնարավոր է, ի՞նչ կա դրա մեջ»:
Խոսելով այն մասին, թե հնարավո՞ր է, որ Հովիկ Աբրահամյանին նորից պաշտոն տան, Արգամ Աբրահամյանն ասաց, որ չգիտի, խնդրեց, որ իրեն նման հարցեր չտրվեն:
Ճշտող հարցին՝ կա՞ ինչ-որ խանգարող հանգամանք, որ Հովիկ Աբրահամյանին նորից պաշտոն տան, Արգամ Աբրահամյանը պատասխանեց. «Ոչ»:
Հարցին, թե ինչո՞ւ «Ծառուկյան դաշինքը» Արտաշատում քաղաքապետի թեկնածու չառաջադրեց, Արգամ Աբրահամյանը պատասխանեց, որ «Հայաստանի Հանրապետական կուսակցության» ներկայացրած թեկնածուն իրենց համար ընդունելի թեկնածու է:
Լրագրողների այն հարցին, թե կարելի՞ է ենթադրել, որ այսպիսով Աբրահամյանները թուլացնում են իրենց ազդեցությունը Արտաշատում, քաղաքային իշխանությունը, լծակները հանձնում են ՀՀԿ-ին, Արգամ Աբրահամյանը պատասխանեց. «Ի՞նչ իշխանություն, ի՞նչ է նշանակում իշխանություն, ի՞նչ լծակ»:
Նա նաև հերքեց մամուլի հրապարակումները, թե իր և Գագիկ Ծառուկյանի հարաբերությունները սրվել են: «Սխալ տեղեկություններ են»,- նշեց պատգամավորը: