Եթե մարդ չի ցանկանում սպա լինել, միշտ կարող է որպես շարքային ծառայել. Վիգեն Սարգսյանը՝ «Զինվորական ծառայության» օրենքի մասին
Երկակի ստանդարտներն ինձ համար ընդունելի չեն, քանի որ կամ բոլորը բարձրագույն կրթություն ստացածները պետք է բանակ չգնան, կամ պետք է բոլորը զորակոչվեն: Այսօր Tert.am-ի հարցին ի պատասխան ասաց Պաշտպանություն նախարար Վիգեն Սարգսյանը:
Tert.am-ի հարցին, որ «Զինվորական ծառայության» մասին օրենքը զրկում է տարկետման իրավունքից՝ պատճառաբանությամբ, թե ասպիրանտուրական կրթությունը պարտադիր զինվորական ծառայությունից խուսափելու միջոց է, ի՞նչ է կրթական համակարգի կոռուպցիան ՊՆ գործառո՞ւյթն է, Վիգեն Սարգսյանը պատասխանեց.
«Սա մասնակի պոկված ձևակերպում է ավելի լայն համատեքստից: Նման կերպ ձևելով արտահայտությունները միշտ կարելի է, անհեթեթություն գտնել ամեն ինչի մեջ: Իմ ասածն այդ հարցով մեկն էր և կարող եմ կրկնել: Ես չեմ կարող ընդունել, որ ընդունելության քննության ժամանակ կես միավոր ավել կամ պակաս ստացածը պետք է երկրի քաղաքացու համար իրավական կարգավիճակ փոխի երկրի պաշտպանության նկատմամբ իր պարտավորությունների առումով: Իմ առաջարկած ծրագիրը միտված է նաև գիտության ամրապնդմանը, որովհետև մենք հնարավորություն են տալիս քաղաքացուն, որն ունի ուսման ներուժ, ուսման ընթացում ստանալ նաև սպայական նախապատրաստում»:
Նախարարը շեշտեց, որ բացառիկ գիտելիքներով աչքի ընկած անձինք կարող են լինել գիտական վաշտերում ու դասակներում, որտեղ նման գիտնականները կարող են կիրառական առումով օգտակար լինել՝ մասնակցելով իրենց երկրի պաշտպանությանը:
Tert.am-ի դիտարկմանը, իսկ եթե մարդ չի ցանկանում իր գիտելիքները ԶՈւ-ում կիրառել, չէ՞ որ դա էլ մարդու իրավունքներից է, Վիգեն Սարգսյանը պատասխանեց. «Եթե մարդ չի ցանկանում, սպա լինել, միշտ կարող է շարքային ծառայել, այսօր էլ դրա իրավունքն ունի: Եթե ինքը չի ցանկանում երկրի պաշտպանությանը մասնակցել, ապա դա հակասահմանադրական է, որովհետև Սահմանադրության մեջ գրված է, որ յուրաքանչյուր ոք մասնակցում է իր երկրի պաշտպանությանը: Պարզապես մենք նոր տարբերակներ ենք առաջարկում` ավելի արդյունավետ դարձնելու համար»:
Վիգեն Սարգսյանը շեշտեց, թե օրենքին դեմ արտահայտվողների հակափաստարկները համոզիչ չեն: Նրա կարծիքով՝ մարդիկ, որոնք նման տարբերակով խուսափել են ծառայությունից, զուտ ցանկությունն ունեն, որ առկա սողանքը բաց լինի: Հարցին, չէ՞ որ շատերը նաև այս կամ այն հիվանդության պատճառով են խուսափում ծառայությունից, Վիգեն Սարգսյանը պատասխանեց.«Եթե մենք խոսում են բժշկական սողանցքների մասին, ապա այս պահին հարուցված է ավելի շատ քրեական գործ, մեղադրանք է ներկայացված մարդկանց, ու այդ գործերը մինչև վերջ պետք է քննվեն: Մենք պետք է ստեղծենք այնպիսի վիճակ, որ բժշկական ոլորտում էլ սողանցքները փակվեն: Մեկը մյուսին չի բացառում»:
Նախարար նկատեց, որ իրենք տարբերակներ են մշակել նաև պաշտոններին համար, այսինքն՝ հայտարարագրերում պետք է լինի, թե պաշտոնյան ու իր ընտանիքի անդամներն ինչպես են կատարել զինվորական ծառայություն: Սարգսյանը հորդորեց ԶԼՄ-ների ուշադիր լինել նաև և պարզել, թե ովքեր են ծառայել բանակում, ովքեր՝ ոչ:
«Ինչ վերաբերում է հարցին, որ այս նախագիծը կարող է արտագաղթի հանգեցնել, ապա ասեմ, որ միշտ կլինեն մարդիկ, որոնք անձնական, ընտանեկան երջանկությունը վեր են դասում պետական ու համազգային շահից: Դա իրենց խղճի և ընկալման ընտրություն է»,- շարունակեց Վիգեն Սարգսյանը:
Վերջինս, անդրադառնալով հարցին, թե արդյո՞ք հանդիպել է նախագծին դեմ ուսանողների, որոնք բողոքի ակցիա էին իրականացնում, ասաց, որ ինքը պարբերաբար հանդիպում է ամենատարբեր ուսանողական կառույցների ներկայացուցիչների հետ:
«Տեղյակ եմ, որ «Ելք» դաշինքից Արարատ Միրզոյանը մի քանի երիտասարդի ակտիվ հրահրում էր համալսարանում դասադուլ սկսել: Դրա մասին խոսել եմ նաև խորհրդարանում: Նրանցից մի քանիսի հետ հանդիպել եմ առանց լուսաբանելու, անուններ չեմ ուզում հնչեցնել, նրանք մանրամասն պատմել են, թե ինչպես է ընթացել իրենց երկխոսությունը «Ելքի» հետ այդ թեմայով: Քաղաքական մշակույթի հարց է, ամեն մեկն իր ձևն է ընտրում»,-ընդգծեց Վիգեն Սարգսյանը:
Դիտարկմանն՝ ի՞նչ է` դասալիք ու սահմանադրությունը խախտո՞ղ է համարում ՀՀԿ-ականներին, որոնք չեն ծառայել բանակում, նախարարն արձագանքեց. «Ոչ, ես ձեր գնահատականը համարում եմ ոչ կոռեկտ: Եթե դուք համարում եք, որ Նիկոլ Փաշինյանը, նույն Արարատ Միրզոյանը դասալիք են, որովհետև օգտվել են տարկետումից, ապա ձեր գնահատականը բոլորի համար հավասարապես ճիշտ է: Ես չեմ համարում, որ նրանք դասալիք են: Հիշեցնեմ, որ խորհրդարանում այդ ձևակերպումները և այդ լեզուն ես չեմ սկսել օգտագործել: Ես Արարատ Միրզոյանի պատվոգիր ստանալու թեման բարձրացրել եմ այն բանից հետո, երբ «Ելք» դաշինքը բարձրացրել է բանակում չծառայած, բայց բանակի գերատեսչական մեդալներով պարգևատրվածների հարց: Ես էլ ասել եմ, որ պետք է սեփական աչքի գերանը նկատել, հետո դիմացինի աչքի փուշը»: