Մենք չափից շատ մեծ հույսեր էինք կապում ԵԱՏՄ-ի հետ. Աթամբաև
Ղրղզստանի նախագահ Ալմազբեկ Աթամբաևը հայտարարել է, որ Ղրղզստան-Ղազախստան սահմանին վերջին իրադարձությունները ցույց են տվել, որ «մենք չափից շատ մեծ հույսեր էինք կապում ԵԱՏՄ-ի հետ»: Այդ մասին Ղրղզստանի նախագահը հայտնել է 12 երկրների դեսպաններից հավատարմագրեր ստանալու արարողության ժամանակ, հայտնում է Sputnik Ղրղզստանը:
«Այդ իրադարձությունները ցույց են տվել, որ մենք տնտեսական զարգացման հարցում չպետք է մեզ խաբենք և չափազանց մեծ հույսեր կապենք ԵԱՏՄ-ի հետ: Իհարկե, անկախ ամեն ինչից, այժմ և ապագայում ռազմավարական գործընկեր և հուսալի դաշնակից է մնում եղբայրական Ռուսաստանը: Բայց չի կարող հուսալի լինել միությունը, որը կախված է մի մարդու, անգամ աշխարհի ամենամեծ մարդու քմահաճույքից»,- ասել է նա:
Աթամբաևի խոսքով՝ «ցանկացած միություն պետք է նախևառաջ ենթարկվի այդ միության մասնակիցների միջև կնքված պայմանագրերին և համաձայնագրերին»: Այդ առնչությամբ նա հայտարարել է, որ մտադիր է կառավարությանը հանձնարարել շտապ կարգով լուծել գյուղատնտեսական արտադրանքի սպառման այլընտրանքային շուկաների հարցը:
«Անկասկած, այստեղ որոնելու կարիք էլ չկա: Դա Ուզբեկստանի 32 միլիոնանոց և Չինաստանի 1,5 միլիարդանոց շուկան է: Ինչ վերաբերում է արդյունաբերական ապրանքներին, ես խորհուրդ եմ տալիս ձեռնարկատերերին և կառավարությանն այսուհետ ապրանքները Ռուսաստան ուղարկել կապարակնքված երկաթուղային վագոններով: Որովհետև մենք նման պայմանավորվածություն ունեցել ենք Ռուսաստանի, հարգելի Վլադիմիր Պուտինի հետ»,- ասել է Աթամբաևը:
Ավելի վաղ Աթամբաևը հայտարարել է, որ Ղրղզստանի և Ղազախստանի սահմանին տիրող իրավիճակը հակասում է ԵԱՏՄ շրջանակում ձեռքբերված պայմանավորվածություններին:
Ղրղզստանի և Ղազախստանի սահմանին իրավիճակը սրվել էր հոկտեմբերի 10-ին, երբ Ղազախստանի իշխանություններն ուժեղացրել էին անցակետերում հսկողությունը: Արդյունքում ստեղծված հերթերում կորուստներ են կրել և՛ բեռնատարների վարորդները, և՛ բեռների սեփականատերերը: Աստանայում հոկտեմբերի 18-ին Ղրղզստանի և Ղազախստանի նախագահները պայմանավորվել են հոկտեմբերի 19-ից հեշտացնել ուղևորատար տրանսպորտի, ուղեբեռով անձանց և դատարկ բեռնատարների անցումը:
Սահմանային հսկողությունը միակողմանի խստացնելու Ղազախստանի քայլին նախորդել է Ղազախստանի նախագահ Նուրսուլթան Նազարբաևին ուղղված Աթամբաևի քննադատությունը, որը մեղադրել է նրան Ղրղզստանի ներքին գործերին և նախագահական ընտրություններին միջամտելու համար: