Սպանություն ու ինքնասպանություն լինում է բոլոր բանակներում, պետք է լրջանալ, բայց չհիասթափվել. Վիգեն Սարգսյան (տեսանյութ)
ԱԺ-ում օրերս քննարկված «Պաշտպանության» և «Զինվորական ծառայության» մասին օրենքները նույնպես բանակի արդիականացման համատեքստում են:
Այսօր լրագրողների հետ հանդիպմանը նման տեսակետ հայտնեց ՀՀ պաշտպանության նախարար Վիգեն Սարգսյանը՝ անդրադառնալով նրան, թե ՀՀ նախագահ Սերժ Սարգսյանի՝ բանակի արդիականացման հանձնարարականի հիմքում ի՞նչ խնդիրներ են դրված:
Նա նկատեց, որ ԶՈւ-ն ունի իր զարգացման ծրագիրը, սակայն այսօր խնդիր է դրված, որ այդ ծրագրերը լինին թռիչքային:
«Ծրագրերը՝ կապված թե՛ սպառազինության, թե՛ ռազմական տեխնիկայի, թե՛ կրթական ծրագրերի, թե՛ հասարակություն-բանակ կապի, թե՛ ծառայություն նոր տեսակներ ներգրավելու առումով, պետք է ունենան թռիչքային զարգացում: «Պաշտպանության» և «Զինվորական ծառայության» մասին օրենքները բավականին լուրջ հիմք են ստեղծում բանակի արդիականացման համար»,-ասաց նա:
Նախարարի խոսքով՝ իրենք անելու են ամեն ինչ նշված ժամկետներում արդիականացման ծրագիր ներկայացնելու համար: Սարգսյանը նկատեց, որ այսօրվա մարտահրավերները բավականին մեծ են. «Այսօրվա իշխանություններին կարելի է մեղադրել բազմաթիվ բաների մեջ, բայց ո՛չ հակառակորդի ընտրության, ո՛չ հակառակորդի տեսակի, ո՛չ տարածաշրջանի նկատմամբ հակառակորդի անպատասխանատվության համար: Մենք պետք է հասկանանք, թե որպես ազգ ինչպես ենք ամրապնդվում, ինչպես ենք Եռաբլուրում յուրաքանչյուր շիրիմին նայելով, կսկիծ զգալով՝ հասականում, որ ամեն շիրիմ պարտավորեցնող է»,- շարունակեց նախարարը:
Վիգեն Սարգսյանը կարծում է, որ այսօր պետք է ռեալ գնահատենք իրականությունը և հասկանանք, որ ապրում ենք շատ բարդ տարածաշրջանում: Միևնույն ժամանակ նա շեշտեց, թե բարդ տարածաշրջանում ապրելը դեռ չի խոսում նրա մասին, որ մենք պետք է տկար լինենք: Նրա խոսքով՝ պատմությունը ցույց է տալիս, որ բարդությունը հաճախ կոփում է, ավելին՝ այն, ամեն ինչ մեզ չի սպանում, դարձնում է ավելի ուժեղ:
«Մենք պետք է այս տրամաբանությամբ կառուցենք մեր Զինված ուժերը, այս տրամաբանությամբ կառուցենք բանակ-հասարակություն կապը: Վստահ եմ՝ մենք անպայման հաջողելու ենք այս ճանապարհին»,- նշեց Սարգսյանը:
Դիտարկմանը, որ ՀՀ-ում շատ անգամ մի շարք ծրագրեր լավ են լինում, պարզապես թղթի վրա են մնում, ինչպե՞ս վստահ լինենք, որ կկատարվի՝ հաշվի առնելով նաև բանակում միջանձնային հարաբերություններով տեղի ունեցած միջադեպերը, Վիգեն Սարգսյան արձագանքեց. «Վստահ լինելը քիչ է, պետք է աշխատել այդ ուղղությամբ՝ ամեն մեկն իր տեղում լինելով: Մենք բոլորս՝ որպես ազգ, անելիք ունենք մեր երկրում, մեր երկրի պաշտպանության ամրապնդման գործում: Ցավոք սրտի, սպանություն ու ինքնասպանություն լինում է բոլոր բանակներում, բանակից դուրս: Մենք՝ որպես բանակ, պետք է կարողանանք ավելի սիստեմատիկ վերլուծություններով, հետևողական աշխատանքով նվազագույնի հասցնենք այդ դեպքերը: Բայց այս դեպքերից որևէ մեկը երաշխավորված չէ, այս դեպքերը լրջանալու, բայց ոչ թե հուսահատվելու առիթ պետք է լինեն»: