ԼՂ հարցում պաշտոնական Երևանը նոր մոտեցում է ձևավորել՝ դիրքորոշման կարծրացում, խաղաղության պարտադրելու նոր մեխանիզմներ. Հրանտ Մելիք-Շահնազարյան
ՀՀ Նախագահ Սերժ Սարգսյանի՝ պաշտպանական ոլորտին առնչվող վերջին ելույթի կարևոր շեշտադրումներին այսօր հրավիրված ասուլիսին անդրադարձան քաղաքագետ Հրանտ Մելիք-Շահնազարյանը և «Ելք» խմբակցության քարտուղար Գևորգ Գորգիսյանը:
Հրանտ Մելիք-Շահնազարյանը նկատեց, թե Սերժ Սարգսյանի ելույթը տրամաբանական շարունակությունն էր այն խնդիրների, որոնք ՀՀ նախագահը հնչեցրել էր Հայաստան-Սփյուռք համաժողովին, ՄԱԿ-ի ամբիոնից, ինչպես նաև Ժնևում տրված մեկնաբանություններում:
«Կարևոր ուղերձներից մեկն այն էր, որ հնարավոր չէ մեկ ձեռքով պատերազմել, մյուսով՝ բանակցել: Տեսնում ենք, որ Ադրբեջանի նախագահ Ալիևը պայմանավորվածությունների տակ ստորագրում է և բառացիորեն հաջորդ օրն այդ պայմանավորվածությունները խախտում, և տարածաշրջանում կայունությունը հասկանալի չի դառնում, վտանգը շարունակում է գոյություն ունենալ»,-ասաց նա:
Քաղաքագետը նշեց, թե պաշտոնական Երևանը նոր մոտեցում է ձևավորել ապրիլյան պատերազմից հետո, թեև հնարավոր է՝ մի քիչ ուշացած, երբ Ադրբեջանը փորձեց ռազմական սադրանքների ճանապարհով քաղաքական իրավիճակ փոխել:
«Այդուամենայնիվ ռազմական ագրեսիան անհետևանք չէր կարող մնալ, և հայկական կողմն այլևս խոսում է մի կողմից դիրքորոշման կարծրացման անհրաժեշտության պահանջի մասին, նախագահի խոսքով՝ հայության ողջ շերտերում։ Մյուսը՝ խաղաղության պարտադրելու նոր մեխանիզմներն են, հնարավոր է եղել ստիպել Ալիևին Վիեննայում և Սանկտ-Պետերբուրգում ստորագրել այդ պայմանավորվածությունները, բայց դեռևս հնարավոր չէ հասնել նրան, որ կյանքի կոչվեն»,-ասաց նա և հավելեց, որ հայկական կողմը ցանկանում է համոզված լինել, որ բանակցությունների համար տրված նոր ժամանակը, եթե լինեն նման բանակցություններ, Ադրբեջանը չի օգտագործելու հերթական պատերազմի նախապատրաստվելու համար:
«Պետք հասել նրան, որ կայունությունն ու անվտանգությունը՝ որպես գործող գործոն, գոյություն ունենան: Հիմա, կլինի դիվանագիտական դիրքորոշման կարծրացման միջոցով, թե միջնորդների հետ համագործակցության միջոցով, պետք է ճնշումներ գործադրվեն Ադրբեջանի վրա, որ հասնեն պայմանավորվածությունների պահպանման: Փաստ է, որ Հայաստանը չի բանակցի Ադրբեջանի հետ, քանի դեռ կան սահմանին վտանգներ. մի ձեռքով կրակում, մի ձեռքով բանակցում է Ալիևը»,-ասաց նա:
Հարցին, որ եթե չկան բանակցություններ, ապա հանդիպումներն ի՞նչ են, քաղաքագետը պատասխանեց, թե պաշտոնապես հայտարարվել է, որ քննարկումներ այս պահին չկան:
«Ասվել է, որ մինչև կրակը չդադարեցվի, բանակցությունների մասին չեն պայմանավորվի։ Բանակցության գործընթաց՝ որպես այդպիսին, չի կարող լինել, նույնիսկ եթե մեծ ցանկություն լինի»,-ասաց նա և նկատեց, թե ինքը վատատես է այդ հարցում, որ կարող են քաղաքական լուծումներ լինել:
Ազգային ժողովի «Ելք» խմբակցության քարտուղար Գևորգ Գորգիսյանը նշեց, թե փորձը ցույց է տալիս, որ Ադրբեջանի հետ ցանկացած պայմանավորվածություն ի վերջո խախտվում է, և մենք չենք կարող երբեք որևէ պայմանավորվածության վրա հույս դնել:
«Ադրբեջանի ռազմական ներխուժումները զսպելու միակ տարբերակը մեր ռազմական ոլորտի զարգացումն է, իսկ մենք գիտենք, որ քանի որ Ադրբեջանն ունի նավթ, մենք զենք գնելու մրցավազքում միշտ պարտվելու ենք: Դրա համար պետք է մեր գիտական ներուժն ամբողջությամբ ուղղենք նոր զինատեսակներ, նոր ռազմատեխնիկա արտադրելու գործին: Փառք Աստծո, ապրիլյան պատերազմից հետո մեր իշխանությունները մի քիչ խելքի եկան, և սկսեցինք մինչ-որ բաներ անել: Մենք տարիներ առաջ էինք դրա մասին խոսում, որ պետք է դա անել, և ՀՀ-ում կա այդ ներուժը»,-ասաց նա: