Երիտասարդները տարբեր կարծիքներ ունեն տարկետման վերացման վերաբերյալ. հարցում (տեսանյութ)
Զինվորական ծառայության անցնելու տարկետման իրավունքի վերաբերյալ փոփոխությունը, կարծես թե, երկու բևեռների է բաժանել երիտասարդներին:
Պետական ճարտարագիտական համալսարանի մերձակայքում Tert.am-ի հարցման ժամանակ ուսանողներից ոմանք նշում էին, որ ճիշտ է տարկետման իրավունքը վերացնելը՝ սովորողը, միևնույն է, ծառայությունից հետո էլ է շարունակելու ուսումը: Հարցվածների մյուս մասն էլ կարծում էր, որ որոշ խմբի համար, այնուամենայնիվ, պետք է գործեր այս իրավունքը:
Հիշեցնենք, որ այսօր՝ հոկտեմբերի 27-ին Ազգային ժողովն առաջին ընթերցմամբ ընդունեց «Զինվորական ծառայության և զինծառայողի կարգավիճակի մասին» օրենքի նախագիծը: Այն զինվորական ծառայության հետ կապված բազմաթիվ փոփոխություններ էր նախատեսում, բայց վիճարկելի դրույթ էր համարվում տարկետման խստացումը: Ըստ նախարար Վիգեն Սարգսյանի՝ 18 տարին լրացած արական սեռի յուրաքանչյուր ՀՀ քաղաքացի պարտավոր է զորակոչվել բանակ:
Հարցվածներից մեկի համոզմամբ՝ սովորելու ցանկություն ունեցողի համար տարկետման իրավունքի վերացումը խոչընդոտներ չի առաջացնի:
«Եթե ցանկանում ես սովորել, ապա ծառայությունից հետո էլ կսովորես: Ինձ թվում է՝ տարկետման իրավունքի վերացմամբ ավելի լավ կլինի, քանի որ 18 տարեկանում ավելի լավ ես հարմարվում բանակային կյանքին, իսկ 24-25 տարեկանում արդեն դժվար է լինում ծառայությունը: Բացի այդ, բանակն էլ է շատ բան տալիս տղաներին, կյանքին այլ ձև են սկսում նայել»,- նշեց նա:
Մեկ այլ երիտասարդ էլ նկատեց, որ եթե պետությունը ռազմական իրավիճակում է, այս օրենքի փոփոխությունը անհրաժեշտ է, բայց միևնույն ժամանակ կարևոր է գիտությունը զարգացնելը:
«Չեմ կարող ասել՝ այն կվնասի՞, թե ոչ, բայց անձամբ ես փոփոխություն չէի անի, անձամբ ես նույնչափ կարևորություն կտայի ինչպես գիտությանը, այնպես էլ ծառայությանը: Բայց, բնականաբար, փոփոխությունները նախաձեռնողներն ավելի շատ են հասկանում, քան ես»,- ասաց նա:
Օրենքի փոփոխությանը դեմ արտահայտվողները, թեև համամիտ են, որ ուսանողներից շատերը ակադեմիական տարկետման են գնում ծառայությունից խուսափելու համար, բայց իրական սովորողների համար պետք էր որոշ իրավունքներ պահել:
«Ես համաձայն չեմ այս օրենքի նախագծի հետ, որովհետև մեր պետությանը պետք են կրթության մեջ առաջադիմող երիտասարդներ, և պետք է չէ այդ մոտ 800 հոգուն տանել բանակ: Թող այս մարդիկ գոնե կրթության միջոցով օգուտ տան երկրին»,- նշեց մեկ ուրիշը:
Մանրամասները՝ տեսանյութում: