Թուրքիայում հեղաշրջման փորձին մասնակցության համար մեղադրվող 25 մարդ դատապարտվել է ցմահ ազատազրկման
Անկարայի առանձնակի ծանր հանցագործությունների թիվ 17 դատարանը ցմահ ազատազրկման է դատապարտել երկրի առափնյա անվտանգության 25 աշխատակցի՝ այդ թվում կառույցի նախկին ղեկավար Հաքան Ուսթեմին։ Նրանք մեղադրվում էին անցյալ տարվա հուլիսի 15-ին տեղի ունեցած հեղաշրջման փորձին մասնակցություն ունենալու համար, հաղորդում է թուրքական «Միլլիյեթ» պարբերականը:
Նշվում է, որ մեղադրյալները չեն ընդունել իրենց առաջադրված մեղադրանքներն ու պահանջել են իրենց ազատ արձակել: Իրենց պաշտպանական ճառի ընթացքում մեղադրյալները պնդել են, որ տեղյակ չեն եղել, թե իրականում ինչ է կատարվում, և կատարել են իրենց ծառայողական պարտքը:
Դատական գործով անցնող ևս երեք մեղադրյալ արդարացվել ու ազատ է արձակվել:
Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին: