Ժամանակը չի բուժում, միայն խորացնում է վերքերը. հոկտեմբերի 27-ին սպանված Արմենակ Արմենակյանի կին
Լուսանկարը՝ armlur.am-ի
1999 թվականի հոկտեմբերի 27-ին մի ակնթարթում ահաբեկիչների կողմից գլխատվեց ամբողջ պետականություն. այո՛, դա համայն հայության պատմության մեջ սև գիծ էր: Tert.am-ի հետ զրույցում նման տեսակետ հայտնեց հոկտեմբերի 27-ի ոճրագործությանը զոհ դարձած ԱԺ պատգամավոր Արմենակ Արմենակյանի կինը՝ Արմենուհի Արմենակյանը: Նա այսօր չի հասկանում այն մարդկանց, որոնք ասում են, թե ժամանակը բուժում է վերքերը, հակառակն է փաստում՝ գնալով վերքը խորանում են:
«Վերացրեցին այնպիսի մարդկանց, որոնց հետ մեծ հույսեր էինք կապում, նրանց մեջ էին տեսնում նաև հայ ժողովրդի կյանքն ու փայլուն ապագան: Այսօր մեր ընտանիքին հարցական մնաց, թե ինչու կամ ինչպես զոհվեց Արմենակ Արմենակյանը, մի մարդ, որը վայելում էր թե՛ ընտանիքի,թե՛ ընկերների, թե՛ յուրաքանչյուրի հարգանքը: Մեր Արմենը, այսպես էին դիմում Արմեն Արմենակյանին իր հարազատներն ու ընկերները»,- ասաց նա:
Տիկին Արմենակյանը պատմեց, որ այսօր մնացել են հիշողությունները և հիշեց, որ Արմենակ Արմենակյանը մասնակցել է Արցախի ազատագրական պայքարին մինչև վերջ, անձամբ կազմավորել է «Մեծն Տիգրան» աշխարհազորային գունդը՝ լինելով հրամանատար: Նա հիշում է՝ Արմենակ Արմենակյանի խստության ներքո կար հոգատար մարդ՝ իր երեխաների նկատմամբ, իսկ ծնողները նրա համար ընդհանրապես սրբություն էին:
«Որդիներս փոքր էին, աղջիկս 5 տարեկան էր, նրանց մեջ առ այսօր մնացել է հիշողությունը, թե հայրն առավոտյան ինչպես է գնացել աշխատանքի և անպայման պետք է վերադառնա: Արմենակը ընկերների շրջանում էլ մեծ սեր էր վայելում, ընկերներն ասում են, որ առանց Արմենակի խորհրդի ոչինչ չէին ձեռնարկում և մինչ այսօր հիշում են, թե ինչպես էր նա օգնում մանկատներին, ծերանոցներին: Նա կանգնած էր խեղճի ու անօգնականի կողքին»,- հիշեց Արմենուհի Արմենակյան:
Արմենակ Արմենակյանի կնոջ ու ընտանիքի անդամների համար առ այսօր հարցական է, թե ինչու սպանվեց Արմենակ Արմենակյանը: Նա նկատեց, որ ահաբեկչական գործողությանը մասնակցած Կարեն Հունանյանը հայտարարել է, որ ինքը չի կրակել Արմենակ Արմենակյանի վրա:
«Այդ դեպքում ո՞վ սպանեց Արմենակ Արմենակյանին, սա մնաց առեղծված: Երբ ասում են, թե ցանկանում էին վերացնել Կարեն Դեմիրճյանին և Վազգեն Սարգսյանին, դրա համար մտան ԱԺ, Գրետա մայրիկն ասում է, որ եթե Վազգենին էին ուզում վերացնել, թող դրսում վերացնեին, ինչու հենց ամենաապահով տեղը պետք է մտնեին: Այսօր և այն ժամանակ էլ որևէ մեկը չէր կարող մտնել ԱԺ, զենքերն ինչպե՞ս տեղափոխվեցին այդքան հանգիստ, ինչպես միանգամից զինված ահաբեկչությունը կազմակերպեցին ու նպատակին հասցրեցին: Կարծում եմ՝ մեղավորները դեռ իրենց պատիժը չեն ստացել, կա՞ն, չկա՞ն, մենք այսօր չգիտենք»,- հավելեց Արմենուհի Արմենակյանը և ամուսնու խոսքերից առանձնացրեց` «ազգիս, կրոնիս, պատվիս չկպնեք». սա այսօր գրված է նաև Արմենակ Արմենակյանի շիրմաքարին: