Հոլանդացի գիտնականները պարզել են, որ կորոնավիրուսի երբևէ հայտնի ամենաերկար դեպքը տևել է 613 օր
Հոլանդացի հետազոտողները հայտնաբերել են SARS-CoV-2 վարակի երբևէ հայտնի ամենաերկար դեպքը, որը տևել է 613 օր. այն գրանցվել է իմունային անբավարարություն ունեցող տղամարդու մոտ, որն ի վերջո մահացել է, գրում է odditycentral.com-ը:
72-ամյա տղամարդը, Covid-ի դեմ բազմաթիվ պատվաստումներ ստանալուց հետո, 2022 թվականին վարակվել է կորոնավիրուսի Omicron տարբերակով: Այդ ժամանակվանից ի վեր կորոնավիրուսի համար նրա թեստն անընդհատ դրական է եղել. ընդհանուր առմամբ հիվանդությունը տևել է 613 օր՝ մինչև անցյալ տարվա հոկտեմբերին տղամարդու մահանալը։
Վարակման 20 ամսվա ընթացքում բժիշկներն ամեն ինչ արել են տարեց տղամարդուն օգնելու համար, սակայն ապարդյուն։ Նրա օրգանիզմը չի կարողացել բավականաչափ ուժեղ իմունային պատասխան տալ վիրուսի դեմ պայքարելու համար՝ նույնիսկ հակամարմիններ ստանալուց հետո:
Ամստերդամի համալսարանի բժշկական կենտրոնի (Amsterdam UMC) փորձարարական և մոլեկուլային բժշկության կենտրոնի (CEMM) հետազոտողները նշել են, որ վարակի ընթացքում բժիշկները տղամարդուց բազմիցս նմուշներ են վերցրել՝ վերլուծելու կորոնավիրուսի գենետիկական նյութը, և նրանք պարզել են, որ Omicron BA1-ի սկզբնական տարբերակը ենթարկվել է ավելի քան 50 մուտացիայի, այդ թվում՝ այնպիսի տարբերակների, որոնք կարողանում են խուսափել մարդու իմունային համակարգից:
Բարեբախտաբար, տղամարդուց այլ մարդու վարակի փաստագրված փոխանցում չի եղել: