დავით უსუფაშვილი: გიორგი მარგველაშვილი ისტორიაში შევა როგორც „გიორგი უცნაური“
გიორგი მარგველაშვილი ისტორიაში შევა არა როგორც „გიორგი ბრწყინვალე“ ან „ავ-გიორგი“, არამედ როგორც „გიორგი უცნაური”, - ასე შეაფასა სააგენტო ინტერპრესნიუსთან საუბარში „შენების“ მოძრაობის ლიდერმა, დავით უსუფაშვილმა გიორგი მარგველაშვილის 5-წლიანი საპრეზიდენტო საქმიანობა.
„გიორგი მარგველაშვილს ძალიან რთულ პერიოდში მოუწია პრეზიდენტობა.2012 წლის ცვლილება არ იყო ძალიან მარტივი. მისი გაპრეზიდენტებიდან 2-3 კვირის განმავლობაში განვითარდა უკიდურესად დამაზიანებელი მოვლენები სახელისუფლებო გუნდში, რამაც მის პრეზიდენტობას დიდი დაღი დაასვა.მარგველაშვილი, როგორც ქართული სახელმწიფოს მეთაური, ისტორიაში შევა არა როგორც “გიორგი ბრწყინვალე” ან “ავ-გიორგი”, არამედ როგორც “გიორგი უცნაური”. იგი არც მალავდა იმას, რომ არ არის სტანდარტული საჯარო მოხელე, მასში საკმაოდ ჭარბად არის სახელმწიფოებრივ-პოლიტიკური ჩარჩოების მიღმა არსებული ინტერესები, ფილოსიფიური თუ სხვა. მე პირადად მასთან მრავალი წლის განმავლობაში მომიწია მუშაობა და იშვიათი გამონაკლისის გარდა, ვერ ვიხსენებ რაიმე სერიოზულ პრობლემას, წმინდა საქმიანი თვალსაზრისით. საპარლამენტო და საპრეზიდენტო ურთიერთობა დაღდასმული იყო უმრავლესობასა და პრეზიდენტს შორის არსებული მძიმე ფონის გამო. ამის მიუხედავად, ჩვენ მაინც ვახერხებდით საქმიან ურთიერთობას უშიშროების საბჭოს ფორმატშიც, პრეზიდენტის საპარლამენტო საქმიანობის ფორმატშიც და ა.შ. მე პირადად არ მქონია რაიმე გადაულახავი წინააღმდეგობა მასთან, მიუხედავად იმისა, რომ განსხვავებული აზრები არაერთხელ გვქონია“, - განაცხადა დავით უსუფაშვილმა.