აიათოლა ალი ხამენეიმ იაპონიის პრემიერს უთხრა, რომ აშშ-თან აღარ მოილაპარაკებს
ირანის უზენაესმა ლიდერმა, აიათოლა ალი ხამენეიმ განუცხადა იაპონიის პრემიერ-მინისტრ შინზო აბეს, რომ ირანი არ გაიმეორებს, როგორც მან უწოდა, აშშ-თან მოლაპარაკების „მწარე გამოცდილებას“. ამ განცხადების ფონია თეირანსა და ვაშინგტონს შორის მზარდი დაძაბულობა.
13 ივნისს იაპონელ სტუმართან შეხვედრისას, როგორც ირანის მედია იტყობინება, ხამენეიმ განაცხადა, რომ მას არ მიაჩნია აშშ-ის პრეზიდენტი დონალდ ტრამპი იმის ღირსად, რომ გზავნილები გაუცვალოს მას და არც რამე პასუხი აქვს მისთვის, ახლა ან მომავალში.
ხამენეის თქმით, ტრამპის პირობა, რომ არ ესწრაფვის ირანში რეჟიმის შეცვლას, „სიცრუეა“. მისი თქმით, მას არ სჯერა ვაშინგტონისა, რომ ის აპირებს ირანთან პატიოსნად მოლაპარაკებას.
თეირანსა და ვაშინგტონს შორის დაძაბულობა გაიზარდა ბოლო კვირეებში, ერთი წლის მერე მას მერე, რაც ტრაპმა დატოვა 2015 წელს ირანსა და მსოფლიოს წამყვან ქვეყნებს შორის დადებული ბირთვული შეთანხმება, რომლის მიზანი ირანის ბირთვული პროგრამის შეზღუდვის მიღწევა იყო სანქციების სანაცვლო გაუქმებით.
აბემ, რომელმაც ირანის ლიდერს ტრამპისგან გზავნილი ჩაუტანა, ირანის პრეზიდენტ ჰასან როჰანისთან 12 ივნისის შეხვედრის შემდეგ გაფრთხილება გამოთქვა გაუთვალისწინებელი შეტაკებების შესაძლებლობების შესახებ ახლო აღმოსავლეთში.
დაძაბულობის მომავალ ზრდას მოელიან მას მერე, რაც გავრცელდა ცნობები 13 ივნისს ომანის ყურეში ტანკერებზე თავდასხმების შესახებ.
აშშ-მა სპარსეთის ყურეში დამატებითი ძალები შეიყვანა ბოლო კვირებში მას მერე, რაც ირანი დაადანაშაულეს, რომ საფრთხეს უქმნის იქ გამავალ გემებს. თეირანი ასეთ ბრალდებებს უარყოფს.