როჰანი: ირანი ბირთვული შეთანხმების "ზოგიერთ ვალდებულებას" კვლავ ნაკლებად შეასრულებს

ირანის პრეზიდენტმა, ჰასან როჰანიმ განაცხადა, რომ მისი ქვეყანას კვლავ ნაკლებად დაიცავს მსოფლიოს წამყვან ქვეყნებთან 2015 წელს დადებულ ბირთვულ შეთანხმებას, თუ დოკუმენტზე ხელის მომწერი სხვა ქვეყნები „დადებით სიგნალს“ არ გაუგზავნიან.

15 ივნისს აზიის ქვეყნების ლიდერების სამიტზე დუშანბეში როჰაინიმ თქვა, რომ მისმა ქვეყანამ „გადაწყვიტა, შეაჩეროს ზოგიერთი ვალდებულების შესრულება“, რომლებიც ბირთვული შეთანხმებით აქვს ნაკისრი. მას არ დაუზუსტებია, რომელ ვალდებულებებზეა ლაპარაკი, არც ის განუმარტავს, რა „დადებით სიგნალებს“ მოელის თეირანი.

ირანმა მაისში გამოაცხადა, რომ ბირთვული შეთანხმებიდან აშშ-ის გასვლის და ისლამური რესპუბლიკისთვის ახალი სანქციების დაწესების საპასუხოდ  შეწყვეტს შეთანხმებით ნაკისრი ზოგიერთი პირობის შესრულებას. „ცხადია, რომ ირანს არ შეუძლია დაიცვას ეს ხელშეკრულება ცალმხრივად“, - განაცხადა როჰანიმ ტაჯიკეთის დედაქალაქ დუშანბეში „აზიაში ურთიერთქმედებისა და ნდობის ღონისძიებების თათბირის“ სამიტზე, რომლის მუშაობაში 27 ქვეყნის, მათ შორის,რუსეთის და ჩინეთის ლიდერები მონაწილეობენ.

მისი თქმით, გადაწყვეტილება, ნაკლებად დაიცვას შეთანხმების პირობები, მიღებულ იქნა აშშ-თან დაპირისპირების და შეთანხმებიდან ტრამპის გასვლის, ასევე, მისი თქმით, „უკანონოდ უსაფუძვლო სანქციების დაწესების“ გამო, რომლებსაც სხვა ძალებმაც დაუჭირეს მხარი.