რუსეთის სასამართლომ კვლავ გადადო რეჟისორ სერებრენიკოვის პროცესი
სასამართლომ 17 ივნისს დაადგინა, რომ 16 აგვისტოს განახლდება 49 წლის რეჟისორის და მასთან ერთად სამი განსასჯელის გახმაურებული პროცესი, რომელშიც მათ 133 მილიონი რუბლის, ანუ ორი მილიონი დოლარის გაფლანგვას ედავებიან. ბრალდების თანახმად, ეს თანხა სახელმწიფომ გამოუყო 2011-2014 წლებში "მეშვიდე სტუდიას", სერებრენიკოვის მიერ დაარსებულ არაკომერციულ ორგანიზაციას.
სასამართლო სხდომა პირველად 15 აპრილს გადაიდო - როცა მესჩანსკის რაიონულმა მოსამართლემ, ირინა აკურატოვამ ბრძანება გასცა, "ყოვლისმომცველად" შეფასებულიყო საქმესთან დაკავშირებული ფინანსური, შემოქმედებითი და სხვა ტიპის ინფორმაცია. ეს გადადება მაშინ დაცვის მხარის გამარჯვებად იქნა აღქმული.
სერებრენიკოვი 2017 წლის აგვისტოში დააპატიმრეს, რასაც მოჰყვა საერთაშორისო ყურადღება და პრეზიდენტ ვლადიმირ პუტინის მთავრობის დადანაშაულება, რომ ის ავიწროებს მისდამი კრიტიკულად განწყობილ კულტურულ ფიგურებს.