რუსეთის მართლმადიდებელმა ეკლესიამ უკან დაიხია ეკატერინბურგში ტაძრის მშენებლობის საკითხზე
რუსეთის მართლმადიდებელი ეკლესია აცხადებს, რომ უარს ამბობს "უფლებაზე" საკათედრო ტაძარი აეშენებინა ურალში მდებარე ქალაქ ეკატერინბურგის უთანხმოების საგნად ქცეულ ადგილას, პარკში.
16 ივნისს გავრცელებულ განცხადებაში ეკატერინბურგის და ვერხოტურიეს მიტროპოლიტი კირილე ამბობს, "ტოტალური ტყუილების და ცბიერების ატმოსფეროში" ამ ადგილას ეკლესიის აშენება შესაძლოა მომავალშიც უთანხმოების გამომწვევ საკითხად დარჩეს. კირილე ამბობს, რომ არ სურს "ეშმაკს მისცეს ამის საშუალება".
განცხადების ფონია იშვიათი საზოგადოებრივი პროტესტი ეკლესიის აშენების პროექტის მიმართ. ტაძარი უნდა აშენებულიყო ეკატერინბურგის პოპულარულ პარკში, რასაც მწვავე უკმაყოფილება მოჰყვა. პრეზიდენტმა ვლადიმირ პუტინმა ყველა მხარეს მოუწოდა კომპრომისული გამოსავალი მოენახათ.
22 მაისს სვერდლოვკის რეგიონის ოფიციალურმა პირებმა უარი თქვეს ეკლესიის პარკში აშენების გეგმაზე და თქვეს, რომ ამ პროექტს ეწინააღმდეგებოდა საჯარო გამოკითხვაში მონაწილე პირთა 74 პროცენტი. გასულ თვეში ეკატერინბურგში რამდენიმე საპროტესტო აქცია გაიმართა, რომელზეც 100-მდე დემონსტრანტი დააკავეს და ორიდან 15 დღემდე მიუსაჯეს პატიმრობა.