კახა კალაძის გადადგომის მოთხოვნით, პარლამენტის წინ აქცია გაიმართა
„არა სიკვდილით სავსე ქალაქს" - ამ სახელწოდებით აქცია სპონტანურად დაიგეგმა. მოქალაქეებს ჰქონდთ პლაკატი წარწერით: „კორუფცია სიცოცხლეს გვართმევს“.
„კალაძემ მორიგი კორუფციული სქემით იმსხვერპლა ბავშვის სიცოცხლე! ქალაქის მერი, რომელიც ქვეყნის ბიუჯეტს კორუფციული გზით ფლანგავს და მუდმივად საფრთხეს უქმნის ქალაქის მცხოვრებთა სიცოცხლეს - უნდა წავიდეს!
ვაკის პარკის შადრევნის რეაბილიტაციაში 13 მილიონი დაიხარჯა, კომპანია, რომელმაც ტენდერი მოიგო არის „გრინსერვის+", რომლის ხელმძღვანელიც 2013 წელს თავად „ქართულმა ოცნებამ" დაიჭირა!" - ნათქვამია საინიციატივო ჯგუფის განცხადებაში.
აქციის ერთ-ერთი ორგანიზატორი, აქტივისტი მამუკა ჯუღელი რადიო თავისუფლებასთან საუბარში აცხადებს: „მოვედი იმიტომ, რომ ძალიან გაბრაზებული ვიყავი, თავს ძალიან უუნაროდ ვგრძნობდი მთელი დღის განმავლობაში. ამდენი ხანი, ამდენი ტრაგედიის შემდეგ კახი კალაძე კიდევ აგრძელებს თავისი სტატუსით ქალაქის მერად ყოფნას. წარმოუდგენელია, რამდენის მოთმენა და ატანა შეგვიძლია. მგონია, რომ საზოგადოებამ, აქტივისტებმა, პოლიტიკურმა პარტიებმა, ყველამ რაღაცნაირად ერთ ტრაგედიაზე მაინც შევძლოთ რაღაცნაირად ორგანიზება ისე რომ პასუხისმგებლობა ავაღებინოთ კახი კალაძეს".
პარლამენტის წინ იმყოფებოდა ახალგაზრდა იურისტთა ასოციაციის თავმჯდომარე ნიკა სიმონიშვილი. ის სამართლებრივ და პოლიტიკურ პასუხისმგებლობას მოითხოვ. „ვხედავთ რამდენად სახიფათო გარემოსა და სახიფათო ქალაქში ვცხოვრობთ. ჩვენ ვხედავთ იმას, რომ ნებისმიერი ჩვენგანი, ან ჩვენი შვილები, ჩვენი მეგობრების, ახლობლების შვილები შეიძლება ასეთი გაუმართავი ინფრასტრუქტურის მსხვერპლნი გახდნენ, შეიწიროს მათი სიცოცხლე და ჯანმრთელობა. რა თქმა უნდა, ეს არის ძალიან მძიმე ფაქტი და უნდა ვისაუბროთ სამართლებრივ პასუხისმგებლობაზე კონკრეტული შემსრულებელი პირების, ვინც იყო მის შემოწმებაზე პასუხისმგებელი, მაგრამ სახელმწიფოს პასუხისმგებლობა არის აუცილებლად ყურადმისაქცევი. შესაბამისად, აქ უნდა ვისაუბროთ სამართლებრივ პასუხისმგებლობაზე სახელმწიფოსი და ასევე, ჩვენ უნდა ვისაუბროთ პასუხისმგებლობაზე პოლიტიკური თვალსაზრისით", - თქვა სიმონიშვილმა.
13 ოქტომბერს ვაკის პარკის შადრევანში დენის დარტყმით დაშავებული ერთი მოზარდი გარდაიცვალა, ერთის მდგომარეობა კი მძიმეა. კონტაქტურია მესამე ბავშვი.
შსს-მ მომხდარ ფაქტზე დაუყოვნებლივ დაიწყო გამოძიება საქართველოს სისხლის სამართლის კოდექსის 240-ე პრიმა მუხლის პირველი ნაწილით. როგორც მინისტრის მოადგილემ განმარტა, გამოძიების მსვლელობისას დაზუსტდა კვალიფიკაცია და გამოძიება გრძელდება სისხლის სამართლის კოდექსის 240-ე პრიმა მუხლის პირველი და მეორე ნაწილით, რაც გულისხმობს ელექტროობიექტზე უსაფრთხოების წესების დარღვევას, რასაც მოჰყვა ადამიანის სიცოცხლის მოსპობა.
დანაშაული 4-დან 7 წლამდე ვადით თავისუფლების აღკვეთას ითვალისწინებს.
მერია ვაკის პარკის განახლების სამუშაოებს ატარებს. სამუშაოები მერმა კახა კალაძემ გუშინ დაათვალიერა - მერია აცხადებდა, რომ "ვაკის პარკში არსებული მცირე კასკადისა და მრგვალი შადრევნის რეაბილიტაცია დაასრულა".