გიორგი რუხაძე: ჩვენ რომ ვიყავით ომში და უკრაინა გვაწვდიდა იარაღს, იმას საფრთხე არ ემუქრებოდა და ჩვენ გვემუქრება? არაფერი საფრთხე არ გვემუქრება, ეს საფრთხე არის საქართველოს ხელისუფლების მოგონილი

ბუნებრივია, სიფრთხილე საჭიროა, მაგრამ სიფრთხილე უკვე სიმხდალეში გადადის და მეტსაც გეტყვით, ღირსებაზე ახდენს გავლენას, ხელისუფლება ღირსებისგან იცლება და უღირსი ხდება, – ამის შესახებ საერთაშორისო ურთიერთობათა სპეციალისტმა, GSAC-ის დამფუძნებელმა, გიორგი რუხაძემ „პალიტრანიუსის“ გადაცემა „თავისუფალ სტუდიაში“ უკრაინა-რუსეთის ომთან დაკავშირებით საქართველოს ხელისუფლების წევრების მიერ გაკეთებულ კომენტარებზე საუბრისას განაცხადა.

გიორგი რუხაძის განცხადებით, საქართველოს პრემიერ-მინისტრის, ირაკლი ღარიბაშვილის მიერ ბოლო პერიოდში გაკეთებული განცხადებები მთლიანად „დაცლილია ღირსებისგან“.

„განცხადებების მერე, რომელიც მოვისმინეთ, გნებავთ ღარიბაშვილისგან, ამ კაცს პრემიერ-მინისტრს უბრალოდ ვერ ვუწოდებ, როგორ შეიძლება ის საქართველოს პრემიერ-მინისტრი, აღმასრულებელი ხელისუფლების პირველი პირი იყოს, წარმოუდგენელია, ეს განცხადებები მთლიანად დაცლილია ღირსებისგან, არაფრით შეიძლება.

საქართველოს სამხედრო ძალები რომ ჩართულიყვნენ ომში, ეს იქნებოდა ომში ჩართვა, ხოლო თუ საქართველო დადგებოდა დასავლურ პარტნიორებთან ერთად და ზუსტად იმ სულისკვეთებით, რა სულისკვეთებითაც ის სამყარო ეხმარება უკრაინას, რომლის წევრობაც გვინდა, ისე მოვიქცეოდით, ეს იქნებოდა ყველაზე ჯანმრთელი და ფრთხილი დამოკიდებულება“, – განაცხადა გიორგი რუხაძემ.

გიორგი რუხაძის თქმით, საქართველოს ხელისუფლების წევრების მიერ გაკეთებული განცხადებების დონე მივიდა იქ, სადაც თავის დროზე იგორ გიორგაძე იყო.

„საქართველოს ხელისუფლების წარმომადგენლები ისე არიან დაშინებულები, რომ რუსეთს ვერ ახსენებენ. საქართველოს პრემიერს დაუსვეს ძალიან მარტივი კითხვა: „ვის ემხრობით, რუსეთს თუ უკრაინას?“ – კაცმა დაიწყო ბოდიალი. კობახიძესაც ეს კითხვა დაუსვეს, მტერი რომელია, უკრაინა თუ რუსეთიო, მანაც რაღაც კილომეტრნახევრიანი იბოდიალა. მე გეტყვით, ირაკლი წერეთელმა ერთხელ იგორ გიორგაძეს დაუსვა კითხვა: „შენ ვისკენ ხარ, ამერიკელებისკენ თუ რუსებისკენ?“ და იმან რა უთხრა იცით? – საქართველოსკენ ვარო. ანუ ჩვენი ხელისუფლება განცხადებების დონეზე მივიდა იქ, სადაც იყო იგორ გიორგაძე“, – განაცხადა გიორგი რუხაძემ.

ამასთან, რუხაძის თქმით, საქართველომ შეიძლება უკრაინას იარაღიც მიაწოდოს და ამის თქმისას „ფერი არ უნდა გვეკარგებოდეს“, რადგან ეს ომში ჩართვას არ ნიშნავს.

„მე მგონია, რომ ყველაფერში შეიძლება მივეხმაროთ უკრაინას და ომში ჩართვასთან ამას კავშირი არ აქვს. შეგვიძლია იარაღი მივაწოდოთ, გენერატორები მივაწოდოთ, ჩვენ არც იარაღს ვაწარმოებთ და არც გენერატორებს. „დვიჟოკებს“ ვაწარმოებთ? აქ არ არის ლაპარაკი იმაზე, რას ვაწარმოებთ და რას არ ვაწარმოებთ. დაახლოებით ისეა, ადამიანი რომ ვიღაცას ეხმარება, ზოგი ლარით დაეხმარება, ზოგი ერთი მილიონი ლარით, ოღონდ ყველა ლარს, ყველა დახმარების ზომას მნიშვნელობა აქვს, ეს უკვე დასაფასებელია. შესაბამისად, საქართველო უნდა მიეხმაროს ისე, როგორც შეუძლია. ჩვენ შეგვიძლია იარაღი მივაწოდოთ და ფერი ნუ გვეკარგება, როცა ამაზე ვსაუბრობთ. ესტონეთი რომ აწვდის, ლატვია რომ აწვდის, ავსტრია, ჩვენ რომ ვიყავით ომში და უკრაინა გვაწვდიდა იარაღს, იმას საფრთხე არ ემუქრებოდა და ჩვენ გვემუქრება? არაფერი საფრთხე არ გვემუქრება, ეს საფრთხე არის საქართველოს ხელისუფლების მოგონილი, რომ თავისის საფრთხეები გაანეიტრალოს, თორემ რაც გვემუქრებოდა მანამდე, ის გვემუქრება ახლაც. აუცილებელი არაა, რაც გაქვს ყველაფერი მიცე, მაგრამ შენ შეგიძლია სიმბოლურად მიაწოდო იარაღი უკრაინას. შეიძლება ეს იყოს ჩაფხუტი, ტყვია-წამალი. ეს არ ნიშნავს ომში ჩართვას“, – განაცხადა გიორგი რუხაძემ.