უკრაინამ გაეროს წევრ ქვეყნებს მიმართა არალეგიტიმურად აღიარონ ორგანიზაციაში რუსეთის ყოფნა
![უკრაინამ გაეროს წევრ ქვეყნებს მიმართა არალეგიტიმურად აღიარონ ორგანიზაციაში რუსეთის ყოფნა](https://gdb.rferl.org/013e0000-0aff-0242-de44-08da8a49bddc_cx0_cy9_cw0_w800_h450.jpg)
უკრაინამ გაეროს წევრ ქვეყნებს მიმართა, განიხილონ ორგანიზაციაში რუსეთის შემდგომი ყოფნის და უშიშროების საბჭოში მისი მუდმივი წევრობის ლეგიტიმურობის საკითხი. თავად უკრაინა მიიჩნევს, რომ რუსეთი წესდების დარღვევით გახდა გაეროს წევრი და წესდებას დღესაც უხეშად არღვევს. უკრაინის საგარეო საქმეთა სამინისტროს განცხადებით, საერთაშორისო სამართლის თვალსაზრისით მოუგვარებელია სტატუსი, რომლითაც რუსეთი სარგებლობს 1991 წლიდან, საბჭოთა კავშირის დაშლის შემდეგ.
უკრაინის საგარეო საქმეთა სამინისტროს თანახმად, რუსეთმა გაეროს უშიშროების საბჭოს მუდმივი წევრის სავარძელი დაიკავა გაეროს წესდებით დადგენილი პროცედურებისთვის გვერდის ავლით, რუსეთის პრეზიდენტ ბორის ელცინის მიერ გაეროს გენერალური მდივნის სახელზე გაგზავნილი უბრალო წერილის საფუძველზე. უკრაინა ყურადღებას ამახვილებს, რომ გაეროს წესდების იმ მუხლში, სადაც ჩამოთვლილია უშიშროების საბჭოს მუდმივი წევრები, რუსეთის ფედერაცია ნახსენები არ არის. უკრაინის საგარეო საქმეთა სამინისტროს შეფასებით, იურიდიული და პოლიტიკური თვალსაზრისით არსებობს მხოლოდ ერთი დასკვნა - რუსეთი გაეროს უშიშროების საბჭოში საბჭოთა კავშირის ადგილის უზურპატორია.
კიევის განცხადებითვე, გაეროს წევრად ქვეყანას უშიშროების საბჭოს რეკომენდაციით იღებს გენერალური ასამბლეა, რუსეთის შემთხვევაში კი, ეს პროცედურა არ ყოფილა და ორგანიზაციაში რუსეთი, როგორც საბჭოთა კავშირის სამართალმემკვიდრე მიიღეს სხვა ქვეყნების მდუმარე თანხმობით.
უკრაინის პოზიციაა, რომ რუსეთი გაეროს წევრი არ უნდა იყოს იმიტომაც, რომ წესდების მიხედვით, ორგანიზაციის მუშაობაში მონაწილეობა შეუძლია მშვიდობისმოყვარე სახელმწიფოს. საგარეო საქმეთა სამინისტროს განცხადებაში საუბარია რუსეთის სამხედრო აგრესიასა და უკრაინის ტერიტორიების ოკუპაციასა და ანექსიაზე 2014 და 2022 წლებში. უკრაინა ხაზს უსვამს, რომ რუსეთი წლებია აგრესიას და ოკუპაციას ახორციელებს სხვა ქვეყნების წინააღმდეგაც. მათ შორის, უკრაინის საგარეო საქმეთა სამინისტრო ასახელებს რუსეთის ქმედებებს აფხაზეთში, სამხრეთ ოსეთში, დნესტრისპირეთსა და მთიან ყარაბაღში. განცხადებაში საუბარია იმ ფაქტებზეც, როცა რუსეთი არ ასრულებს გაეროს რეზოლუციებს და მნიშვნელოვან გადაწყვეტილებებზე, რომელთა აღსრულებას რუსეთი ბლოკავს უშიშროების საბჭოს მუდმივი წევრის სტატუსით გარანტირებული ვეტოს უფლებით.
კიევი მიიჩნევს, რომ გაეროში რუსეთის წევრობა არალეგიტიმურად უნდა გამოცხადდეს, რუსეთის ფედერაციამ წევრობისთვის უნდა გაიაროს ისეთივე საერთაშორისო-სამართლებრივი პროცედურა, როგორიც სხვა ქვეყნებმა და ამასთან, გაეროში რუსეთის დაბრუნება უნდა განიხილებოდეს მხოლოდ წევრობის კრიტერიუმების დაცვის შემთხვევაში.