დღეიდან ვიწყებთ ახალი ფურცლიდან და ვაღიარებთ ერთ მტერს, ეს არის ივანიშვილი და მისი რუსული ოცნება - ხაბეიშვილი
პარტია "ნაციონალური მოძრაობა" ყრილობას მართავს, სადაც შეკრებილებს სიტყვით მიმართა ახლადარჩეულმა თავმჯდომარემ ლევან ხაბეიშვილმა. მან პარტიის სამომავლო გეგმებზე საუბრისას, თბილისში და რაიონებში ახალი ოფისების გახსნა დააანონსა.
"დღეიდან ვიწყებთ ახალი ფურცლიდან და ვაღიარებთ საქართველოს მხოლოდ ერთ მტერს, რომელსაც აქვს სახელი, ეს არის რუსი ოლიგარქი ბიძინა ივანიშვილი და მისი რუსული ოცნება...
უახლოეს პერიოდში დავიწყებთ რაიონებში ერთიანი ნაციონალური მოძრაობის ოფისების გახსნას. ჩვენ უკვე შევქმენით მიხეილ სააკაშვილის გათავისუფლების შტაბი, რომელსაც უხელმძღვანელებს გიორგი ჩალაძე.
უახლოეს პერიოდში თბილისის ენმ-ს ექნება ახალი ოფისი, ჩავატარებთ დედაქალაქში თბილისის კონფერენციას, ავირჩევთ პარტიის ხელმძღვანელებს, ჩავატარაბთ ახალგაზრდულ ყრილობას და დამოუკიდებელი სივრცე ექნებათ ახალგაზრდებს. დავიწყებთ რეგიონალური და რაიონული კონფერენციების მომზადებას.
ჩვენ არ გვაქვს არცერთი წამი დასაკარგი. დადგა დრო, ერთად გავიმარჯვოთ რუსულ ბოროტებაზე, გაჭირვებაზე, რუსულ ოცნებასა და ბიძინა ივანიშვილზე...", - თქვა ხაბეიშვილმა სიტყვით გამოსვლისას.
შეკრებაზე პარტიის ლიდერები, წევრები მივიდნენ, მათ შორის ხატია დეკანოიძე, ლევან ბეჟაშვილი, გია ბარამიძე და ანი წითლიძე. ასევე, რაიონული ორგანიზაციის წარმომადგენლები შეიკრიბნენ. ყრილობას არ ესწრება პარტიის უკვე ყოფილი თავმჯდომარე, ნიკა მელია.
ყრილობას, ასევე ესწრებიან სხვა ოპოზიციური პარტიების წარმომადგენლები, მათ შორის, პაატა მანჯგალაძე "სტრატეგია აღმაშენებლიდან".
როგორც პარტია "ნაციონალურ მოძრაობაში" აღნიშნავენ, დღევანდელი ყრილობა ძირითადად, ტექნიკური ხასიათისაა.
30 იანვარს დასრულდა ორდღიანი არჩევნები "ნაციონალურ მოძრაობაში". პარტიის თავმჯდომარე ლევან ხაბეიშვილი გახდა. არჩევნებში მონაწილეობდა პარტიის მოქმედი ხელმძღვანელი ნიკა მელიაც.
არჩევის შემდეგ ხაბეიშვილმა თქვა, რომ „ნაციონალურ მოძრაობაში" მიღებული პირველი გადაწყვეტილებები დაუკავშირდება მიხეილ სააკაშვილს, რომელიც ამ პარტიის დამფუძნებელია.
„მიშა, მინდა შეგპირდე, რომ არ გავჩერდებით მანამ, სანამ შენი სიცოცხლე და ჯანმრთელობა, ჩვენი ქვეყნის თავისუფლება არ იქნება უზრუნველყოფილი", - აღნიშნა ხაბეიშვილმა.
შეკითხვას - „შევარდებით და ფიზიკურად გამოიხსნით სააკაშვილს?“ - თავმჯდომარედ არჩევამდე ლევან ხაბეიშვილმა ასე უპასუხა: „თუ საჭირო გახდა, ამასაც გავაკეთებთ. ნუ გგონიათ, რომ ამაზე არ წავალთ ან ამას არ გავაკეთებთ, რადგან საუბარია მიშა სააკაშვილის ბედზე და ჩვენი ქვეყნის მომავალზე".