ბლინკენი: ჩინეთი განიხილავს რუსეთისთვის იარაღის მიწოდების საკითხს
ჩინეთი რუსეთს არალეტალურ სამხედრო დახმარებას უწევს, ასევე განიხილავს მისთვის იარაღის მიწოდების საკითხს. ამის შესახებ აშშ-ის სახელმწიფო მდივანმა ენტონი ბლინკენმა განაცხადა ტელეარხ NBC-ისთვის მიცემულ ინტერვიუში.
ბლინკენის თქმით, მან გააფრთხილა ჩინეთის კომპარტიის ცკ-ს უცხოეთის საკითხების კომისიის თავმჯდომარე ვან ი, რომ თუ ჩინეთი რუსეთისთვის იარაღის მიწოდებას დაიწყებს, ამას პეკინისთვის სერიოზული შედეგები მოჰყვება. ორი პოლიტიკოსი მიუნხენის უსაფრთხოების კონფერენციის მსვლელობისას შეხვდა ერთმანეთს. ეს შეხვედრა არ იყო წინასწარ გამოცხადებული ბლინკენის გრაფიკში.
რუსეთისთვის ჩინური იარაღის მიყიდვის საფრთხეზე ბლინკენმა ტელეარხ CBS-ისთვის მიცემულ ინტერვიუშიც ისაუბრა.
NBC-ის წყაროები ადრე იტყობინებოდნენ, რომ ჩინეთმა შესაძლოა რუსეთს სამხედრო ფორმები და ჯავშანჟილეტები მიაწოდოს გაზაფხულის შეტევისთვის, მაგრამ ტელეარხის სტუმრებმა თავი შეიკავს დეტალებზე საუბრისგან.
Bloomberg-ის ცნობით, აშშ-მა იანვარში ჩინეთის სახალხო რესპუბლიკას წარუდგინა მტკიცებულებები, რომ ზოგიერთი ჩინური სახელმწიფო კომპანია შესაძლოა ლეტალურ სამხედრო და ეკონომიკურ დახმარებას უწევდეს რუსეთს უკრაინაში ომში. სააგენტოს წყაროების მიხედვით, ვაშინგტონს მიაჩნია, რომ პეკინს სურს დაეხმაროს რუსეთს და არ არის ნეიტრალური მხარე.
ჩინეთს ჯერჯერობით არ გაუკეთებია კომენტარი რუსეთისთვის დახმარების შესახებ ცნობებზე.
ბლინკენისა და ვან ის შეხვედრის ფონი იყო სკანდალი ჩინური სადაზვერვო აეროსტატის გარშემო, რომელიც აშშ-ის საჰაერო სივრცეში აღმოჩნდა. სახელმწიფო მდივანმა მომხდარს უპასუხისმგებლო საქციელი უწოდა და აღნიშნა, რომ ასეთი რამ აღარ უნდა განმეორდეს. ინციდენტის პასუხად ბლინკენმა გააუქმა ვიზიტი ჩინეთში, სადაც ის ჩინეთის სახალხო რესპუბლიკის ლიდერს, სი ძინპინს უნდა შეხვედროდა.
ვან იმ ბლინკენთან შეხვედრის შეჯამებისას აღნიშნა, რომ აშშ-ის ქცევა ახლოსაა ისტერიასთან. ჩინელი დიპლომატის სიტყვებით, პეკინმა ვაშინგტონს სთხოვა საკითხის მშვიდად მოგვარება, მაგრამ თხოვნა უგულებელყოფილ იქნა და აეროსტატი გამანადგურებლებმა ჩამოაგდეს. ვან იმ აღნიშნა, რომ ჩამოგდებული მოწყობილობა სამოქალაქო ხასიათის იყო და ის ძლიერი ქარის გამო მოხვდა აშშ-ის საჰაერო სივრცეში.
ვან იმ ასევე აღნიშნა, რომ ჩინეთი მიისწრაფვის აშშ-სთან ურთიერთპატივისცემისა და თანამშრომლობისკენ, მაგრამ ვაშინგტონი ჩინეთის სახალხო რესპუბლიკაში სერიოზულ გეოპოლიტიკურ კონკურენტს ხედავს. პეკინს ასეთი შეხედულება მცდარად მიაჩნია, თქვა ჩინელმა დიპლომატმა.