გიული ალასანია: "რომ მოკვდეს და კუბოში ჩაწვეს, მაინც იტყვიან, თამაშობსო?!"
„რომელ მსახიობს შეუძლია მუდმივად სიცხე ჰქონდეს?! გეგულებათ ასეთი მსახიობი მსოფლიოში, რომ თვეები სიცხე ჰქონდეს, ამას თამაშობდეს და წონის ნახევარი დაიკლოს?! ასეთი მსახიობობა მე არ გამიგია!“, - ასე უპასუხა საქართველოს მესამე პრეზიდენტის დედამ, გიული ალასანიამ საქართველოს პრემიერ-მინისტრს ირაკლი ღარიბაშვილს, რომელმაც მიუნხენის უსაფრთხოების კონფერენციის ფარგლებში გამართულ პანელური დისკუსიის მსვლელობისას თქვა, რომ „რომ „ბატონი სააკაშვილი კარგი მსახიობია.“
გიული ალასანიას თქმით, მიხეილ სააკაშვილის გარდაცვალების შემთხვევაში ხელისუფლების წარმომადგენლები მაშინაც იტყვიან, რომ „როლს თამაშობს?!“.
„მოვისმინე და, მართალი გითხრათ, გაკვირვებული დავრჩი. ესე იგი ადამიანმა დაიწყო იმით, რომ ის თურმე დიდი მსახიობია, რომელ მსახიობს შეუძლია მუდმივად სიცხე ჰქონდეს, გეგულებათ ასეთი მსახიობი მსოფლიოში, რომ თვეები სიცხე ჰქონდეს, ამას თამაშობდეს და წონის ნახევარი დაიკლოს?! ასეთი მსახიობობა მე არ გამიგია! ბოლოს რომ მოკვდეს და კუბოში ჩაწვეს, მაინც იტყვიან, როლს თამაშობსო?! სისხლის ღვრისთვის ჩამოვიდაო. უკაცრავად ვის უნახავს მისი სისხლის ღვრა? ვარდების რევოლუცია ისე ჩატარდა, ჩვენ ყველა ამის მოწმე ვიყავით, ერთი ნაკაწრი არავის არ ჰქონია, რა სისხლის ღვრაზეა ლაპარაკი?“, - იკითხა გიული ალასანიამ.
საქართველოს პრემიერ-მინისტრმა ირაკლი ღარიბაშვილმა მიუნხენის უსაფრთხოების კონფერენციის ფარგლებში გამართულ თემატურ პანელურ დისკუსიაზე განაცხადა, რომ მიხეილ „სააკაშვილი კარგი მსახიობია“.
"ის [მიხეილ სააკაშვილი] მკურნალობს კერძო კლინიკაში 8 თვეზე მეტია უკვე, საქართველოს მთავრობა უზრუნველყოფს მაქსიმალურ კომფორტს და მკურნალობას, ყველა პრივილეგიას, რაც არ გააჩნია სხვა პატიმარს. თქვენ ახსენეთ კადრები, ფოტოები, მე იმას ვიტყვი, რომ ბატონი სააკაშვილი კარგი მსახიობია. საქართველოს მთავრობა ყველაფერს აკეთებს, მაქსიმალურ მხარდაჭერას უზრუნველყოფს. ჩვენ შეთავაზება გავუკეთეთ მის ოჯახს, რომ ჩამოიყვანონ ნებისმიერი ექიმი, ნებისმიერი ქვეყნიდან, ნებისმიერი კლინიკიდან, თუ სჭირდება რეალურად მკურნალობა, საქართველოში ჩამოიყვანონ, ესაა ჩემი პასუხი. ალბათ, თქვენ გინახავთ ძალიან ბევრი მცდარი ინფორმაცია რომელიც სააკაშვილის ოჯახის ლობისტური ფირმების მიერ ვრცელდება. მაგალითად, ერთ-ერთ ფაქტს დავასახელებ, გასულ თვეში გაჟღერდა, რომ ერთი მილიონი დოლარი გადაუხადა მისმა ოჯახმა აგრესიული მედიაკამპანიის საწარმოებლად მთელ მსოფლიოში. რაც თქვენ გესმით, რასაც ხედავთ ვიდეოთი, „ფეისბუქზე“, სოციალურ ქსელებში, არ წარმოადგენს რეალობას. არავინ დგას კანონის ზემოთ, ჩვენ გვაქვს ძალიან ძლიერი დემოკრატია საქართველოში, ვაშენებთ დემოკრატიულ ინსტიტუტებს. ეს არის დემოკრატიის არსი, რომ არავინ უნდა იდგეს კანონზე მაღლა. სააკაშვილმა მძიმე დანაშაულები ჩაიდინა, გირგვლიანის მკვლელობიდან დაწყებული, ყოფილი პარლამენტარის ცემით და სხვების გათვალისწინებით",- განაცხადა ირაკლი ღარიბაშვილმა.
მიუნხენში უსაფრთხოების საერთაშორისო კონფერენცია 17-19 თებერვალს იმართება. წელს მისი ცენტრალური თემა უკრაინის ომია.კონფერენციაში მონაწილეობს მრავალი სახელმწიფოს ლიდერი და მაღალი რანგის წარმომადგენელი, მათ შორის გერმანიის კანცლერი ოლაფ შოლცი, საფრანგეთის პრეზიდენტი ემანუელ მაკრონი და აშშ-ის ვიცე პრეზიდენტი კამალა ჰარისი. რუსეთის დელეგაცია მიუნხენში არ მიიწვიეს, განსხვავებით ემიგრაციაში მყოფი რუსი ოპოზიციონერი პოლიტიკოსებისგან.