მედია: ვის ეკუთვნის კომპანიები, რომლებიც წერეთლის გამზირის რეაბილიტაციას განახორციელებენ
თბილისში, წერეთლის გამზირის რეაბილიტაციაზე გამოცხადებული სახელმწიფო შესყიდვა დასრულდა. 3 ლოტად გამოცხადებულ ტენდერში 2-მა კომპანიამ გაიმარჯვა და ამ დროისთვის კომპანიებთან ხელშეკრულების მომზადების პროცესი მიმდინარეობს. კომპანიების მიერ შეთავაზებული თანხის მიხედვით, მერიას გამზირის რეაბილიტაცია 28 414 000 ლარი დაუჯდება, ნაცვლად შესყიდვის სავარაუდო ღირებულებისას დასახელებული 30 453 589 ლარისა.
თბილისის მერიამ წერეთლის გამზირის რეაბილიტაციაზე ტენდერი იანვრის ბოლოს, 3 ლოტად გამოაცხადა. სამივე შემთხვევაში განაცხადების მიღება 4 თებერვალს დაიწყო და 9 თებერვალს დასრულდა.
შესყიდვების ვებ-გვერდზე გამოქვეყნებული ინფორმაციის მიხედვით, პირველ ტენდერში, რომელიც სამტრედიის ქუჩიდან დიდუბის ხიდამდე მონაკვეთის რეაბილიტაციას მოიცავს, შპს მილენიუმ ბილდერს გრუპმა გაიმარჯვა. შესყიდვის სავარაუდო ღირებულება 8 542 914 ლარს შეადგენდა, კომპანიის შეთავაზებული თანხა კი 8 367 000 ლარი იყო.
მეორე მონაკვეთია გვეტაძის ქუჩიდან სამტრედიის ქუჩამდე, აქ შესყიდვის სავარაუდო ღირებულება 13 021 525 ლარი იყო, აქაც კომპანია მილენიუმ ბილდერს გრუპმა გაიმარჯვა, შეთავაზებული თანხა კი იყო 11 874 000 ლარი.
მესამე მონაკვეთის – ცაბაძის ქუჩიდან გვეტაძის ქუჩამდე სარეაბილიტაციო სამუშაოების პროექტირება-მშენებლობის სახელმწიფო შესყიდვის სავარაუდო ღირებულება 8 889 150 ლარი იყო, შპს ერ ტე დე კი გზის ამ მონაკვეთს 8 200 000 ლარად მოაწყობს.
რაც შეეხება თავად კომპანიებს, რეესტრის მიხედვით, შპს მილენიუმ ბილდერს გრუპი 2014 წელს დაფუძნდა, ამ დროისთვის კომპანიის 100%-იანი წილის მფლობელი და დირექტორი არის გიორგი ბუტიკაშვილი. შპს ერ ტე დე კი 2013 წელს დარეგისტრირდა, მისი მფლობელი და დირექტორი კი ლუხუმ ქართლოსიშვილია.
ტენდერების მონიტორინგის მიხედვით, „მილენიუმ ბილდერს გრუპს“ ჯამში 190 ტენდერში აქვს მონაწილეობა მიღებული, მოგებული აქვს 63 ტენდერი, 110 კი წააგო. კონტრაქტების საერთო ღირებულება 58 566 845 ლარია.
„ერ ტე დეს“ კი მონაწილეობა 313 ტენდერში აქვს მიღებული, საიდანაც მოგებული აქვს 75, წაგებული კი 210. მოგებული კონტრაქტების საერთო ღირებულება 121 268 128 ლარს შეადგენს.
ცნობისათვის, თბილისის მერიამ წერეთლის გამზირის რეაბილიტაციაზე სახელმწიფო შესყიდვა თავდაპირველად 2023 წლის იანვარს გამოაცხადა. თუმცა აღნიშნული ტენდერები არ შედგა. როგორც მაშინ მერიაში განმარტეს, ტენდერი ბაზრის კვლევაში შემოთავაზებული მინიმალური შესყიდვის სავარაუდო ღირებულებით გამოცხადდა. მაშინ მერიაში ისიც აღნიშნეს, რომ ხელახალი შესყიდვა ბაზრის კვლევაში დაფიქსირებული შესაბამისი ღირებულების მიხედვით გამოცხადდებოდა.