გერმანელმა აქტივისტებმა დანგრეული რუსული ტანკი დააყენეს ბერლინში, რუსეთის საელჩოსთან
"დანგრეული ტანკი გამოხატავს დაცემას. უკრაინა იქნება პუტინის სტალინგრადი", თქვა ვილანდ გიბელმა, ბერლინის ისტორიის მუზეუმის კურატორმა, რითაც მან საბჭოთა არმიასთან გერმანიის ჯარების მარცხზე მიანიშნა სტალინგრადთან, მეორე მსოფლიო ომის დროს.
აქციის ორგანიზატორის, გიბელისა და მისი კოლეგის, ენო ლენცეს თქმით, ეს ტანკი, რუსული T-72 B1, 2022 წლის 31 მარტს განადგურდა ტანკსაწინააღმდეგო ნაღმით, კიევის მახლობლად მდებარე სოფელ დმიტრივკასთან. მათი თქმით, ის გერმანიაში უკრაინის თავდაცვის სამინისტროსა და უკრაინის სამხედრო ისტორიის ეროვნული მუზეუმის დახმარებით ჩაიტანეს.
ტანკი განათავსეს გერმანიის დედაქალაქის მთავარ ტურისტულ არეალში, უნტერ დენ ლინდენზე, სადაც ის ორშაბათამდე დარჩება.
ბერლინის ცენტრალური რაიონის, მიტეს, რაიონულმა მმართველობამ შარშან უარყო ლენცესა და გიბელის განაცხადი ტანკის განთავსების შესახებ და მიზეზად, სხვათა შორის, საგზაო უსაფრთხოებაც დაასახელა. ორგანიზატორებმა იურიდიულ ზომებს მიმართეს და ბერლინის ადმინისტრაციულმა სასამართლომ მათ პროექტის განხორციელების ნება დართო.
ტანკი შემდგომში ევროპას შემოივლის და ბოლოს, ალბათ გერმანიის ტანკების მუზეუმში მოთავსდება