ისრაელი აშშ-ს: ირანის სარაკეტო წვრთნების უკან შეიძლება დარტყმისთვის მზადება იმალებოდეს

ისრაელის სამხედრო დაზვერვამ აშშ-ის პრეზიდენტის ადმინისტრაცია გააფრთხილა, რომ ირანის ისლამური რევოლუციის გუშაგთა კორპუსის მიერ მოწყობილი სარაკეტო წვრთნები, შესაძლოა, რეალური დარტყმისთვის მზადების საფარი იყოს. ამის შესახებ ინფორმაციას Axios-ი ისრაელისა და ამერიკის წყაროებზე დაყრდნობით ავრცელებს.

წყაროების ცნობით, 20 დეკემბერს, ისრაელის თავდაცვის ძალების გენერალური შტაბის უფროსმა, გენერალ-ლეიტენანტმა ეიალ ზამირმა, ეს ვითარება ტელეფონით განიხილა აშშ-ის ცენტრალური სარდლობის ხელმძღვანელთან, ადმირალ ბრედ კუპერთან. 21 დეკემბერს, თელ-ავივში გამართულ შეხვედრაზე ზამირმა საგანგებოდ აღნიშნა, რომ ირანის სარაკეტო სისტემების გადაადგილება შეიძლება თავდასხმისთვის მზადებაზე მიუთითებდეს, და მოკავშირეებს შორის თავდაცვითი მოქმედებების უფრო მჭიდრო კოორდინაციისკენ მოუწოდა.
ერთ-ერთი ისრაელური წყარო ირანის მხრიდან დაუყოვნებელი დარტყმის ალბათობას აფასებს, როგორც „50%-ზე ნაკლებს“. თუმცა, 2023 წლის ოქტომბერში ჰამასის (აშშ-ში და ევროკავშირში ტერორისტულად შერაცხილი) თავდასხმის შემდეგ, ისრაელმა მნიშვნელოვნად შეამცირა საფრთხის დასაშვები ზღვარი და მსგავს სავარაუდო საშიშროებას სერიოზულობით ეკიდება. Axios-ის ცნობით, ამერიკული დაზვერვა ირანის მხრიდან საომარი მოქმედებების გარდაუვალი დაწყების რაიმე ნიშანს ჯერ ვერ ხედავს.
Axios-ის ცნობით, ირან-ისრაელის კონფლიქტის ახალი გამწვავება შესაძლოა „ორივე მხარის არასწორი გათვლების გამო“ მოხდეს. წყაროები მიიჩნევენ, რომ თითოეულმა ქვეყანამ შეიძლება დაასკვნას, რომ მეორე თავდასხმას ამზადებს და პრევენციული დარტყმის განხორციელება სცადოს.