Қазақстан велоспортшылары Азиадада бір алтын, бір күміс алды
Қытайда өтіп жатқан Азия ойындарында велоспорттан ерлер арасындағы топтық жарыста қазақстандықтар Евгений Федоров алтын, Алексей Луценко күміс медаль иеленді.
Екеуі мәреге бірге келіп, 31 жастағы Луценко 23 жастағы Федоровтың мәрені бірінші болып кесуіне мүмкіндік берді.
Луценко бұған дейін жекелей сында осы Азия ойындарының чемпионы атанған. Ол 2014 жылғы Азия ойындарында бір, 2018 жылғы Азия ойындарында екі алтын иеленген еді.
Қазір Қазақстан 6 алтын, 12 күміс, 35 қола медальмен 12-орында тұр. Хуанжоуда өтіп жатқан Азиадада Қазақстан стенд атудан екі, велоспорттан екі, нысана көздеуден бір, каноэ және байдарка есуден бір алтын медаль алды.
Азия ойындары 8 қазанда аяқталады.