Сәтбаев соты терроризмдi насихаттады деп айыпталған адамды 5 жылға бостандығынан айырды
Ұлытау облысы Сәтбаев қалалық соты "Терроризмді насихаттау" (Қылмыстық кодекстің 256-бабы 1-бөлігі) айыбы тағылған азаматты кінәлі деп тауып, бес жылға еркіндігінен айыру туралы үкім кескен. Үкім заңды күшіне енген. Мұндай ақпаратты 22 қыркүйек күні облыстық прокуратура жариялады.
Алайда ресми хабарламада үкімнің шыққан күні мен сотталған адамның аты-жөні көрсетілмеген, сотталушының тағылған айыптарды мойындағаны-мойындамағаны айтылмаған.
"Сотта анықталғандай, сотталушы ауызша уағыздар айтып, бұрмаланған діни мәтіндерді мысалға келтіріп, қала тұрғындарының санасына әсер етіп, оларды радикалды идеологияға бейімдеуге тырысқан", – деп жазды прокуратура, алайда сотталушының я оның қорғаушыларының сөзін я ұстанымын келтірмеген.