Щучинскіде дәмханада газ жарылып, жеті адам қаза болды

Ақмола облысы Бурабай ауданы Щучинск қаласында дәмханада газ жарылып, жеті адам қаза болды. Бұл жөнінде облыстық төтенше жағдай департаменті хабарлады.

"Бурабай ауданының Щучинск қаласында бес қабатты тұрғын үйге тіркелген бір қабатты дәмханада газ–ауа қоспасы жарылып, өрт шықты. Хабарлама түскеннен кейін 5 минут ішінде Ақмола облысының ТЖД күштері мен құралдары оқиға орнына келді.

Өрт сөндірушілер жанған ғимараттан 8 газ баллонын алып шықты және 10-нан астам адамды құтқарды" деп жазылған департамент хабарламасында.

Департаменттің мәліметінше, 7 адам қаза болған, 26 адам зардап шеккен. Зардап шеккендердің бір бөлігі Бурабай аудандық ауруханасына жатқызылған, алты адам амбулаториялық бақылауға жіберілген. Бірнеше адам төтенше жағдай министрлігінің реанимобилімен және денсаулық сақтау басқармасының медицина қызметкерлерімен Көкшетау қаласына жеткізілген.

"Зардап шеккендер облыстық ауруханаға жатқызылып, оларға барлық қажетті медициналық көмек көрсетілуде. Пациенттердің жағдайы дәрігерлердің тұрақты бақылауында" деп хабарлады департамент.

Оқиға орнында облыстық жедел штаб жұмыс істеп жатқаны хабарланды.

Ақмола облысының әкімдігі қаза болғандардың отбасыларына және зардап шеккендерге барлық қажетті көмек көрсетуге уәде берді.

Дәмханадағы жарылысқа байланысты “Көп адамның өліміне соқтырған өрт қауіпсіздігі талаптарын бұзу” бабы (292-бап, 3-бөлік) бойынша қылмыстық іс қозғалды.