Әкімшілік қамауда отырған блогер Ұлан Шәмшет тағы 5 күнге қамалды

Ақпан айының соңында "билік өкіліне бағынбағаны үшін" 15 тәулікке қамалған Ұлан Шәмшет жазасы бітер шақта тағы бес күнге қамалды.

Бұл жөнінде адвокаты Диас Ахметовке сүйенген журналист Мирас Нұрмұханбетов хабарлады.
“Ұланды камерада темекі тартып, мекеме қызметкеріне [бейәдеп] сөз айтты деп айыптаған... Оған дейін оны тағы бір қамалушымен бірге ылғал камераға орналастырған, ол бұған наразы болған (Ұланның аяғы ауырады - М.Н) және мұны тез ұсақ бұзақылық деп рәсімдеген” деп жазды журналист.
Сот порталындағы дерекке қарағанда, істі 14 наурызда судья Руслан Жамалбеков қараған. Қаулы әзірге жарияланбады.

28 ақпанда Ұлан Шәмшет "Билік өкілінің талабына бағынбау" (667-бап) бабы бойынша 15 тәулікке қамалған еді. Адвокаты сол кезде полиция қызметкерлері оның үйіне барып, тінтіп, тыйым салынған заттар таппағанын хабарлаған еді. Бұдан кейін блогер медициналық куәландырудан бас тартқан кезде үстінен хаттама толтырған.
Almakz.info сайтының редакторы Ұлан Шәмшеттің YouTube-та 17 мыңнан астам жазылушысы бар арнасы бар.
Оның әкімшілік қамау мерзімі бүгін аяқталуы керек болған.