Кажы-Сай: Сыйынуу үйүндөгү өрттүн себеби эки башка чечмеленүүдө

Кажы-Сай айыл өкмөтүнүн жетекчилиги сыйынуу үйүндө чыккан өрттүн себебин дин аралык кастык менен байланыштырууга негиз жок деп эсептейт. Мындай пикирин бүгүн “Азаттык” радиосуна айыл өкмөтүнүн башчысы Памир Кутуев билдирди:

- Сыйынуу үйү Советтер Союзу урагандан бери турат. Атайын өрттөйүн десе мурда эле өрттөп кетишмек. Дин аралык себеп жок го. Күбөлөрдүн жоктугу окуянын себебин иликтөөгө тоскоолдук жаратып жатат.

Ал эми Кыргызстандагы Евангелиялык-христан чиркөөлөр ассоциациясынын төрагасы Александр Шумилин окуя христиан динине өтүп жаткандарга каршы маанай менен байланыштуу болушу ыктымал деп эсептейт:

- Бул кокустук эмес. Ичине кара май куюлган бөтөлкөлөр ыргытылган деп айтып беришти. Жарым жыл мурда шифер чатырга чоң таштарды ыргытып кетишкен.

Ысык-Көл облусунун Тоң райондук ички иштер бөлүмү Кажы-Сайда жайгашкан сыйынуу үйүндө чыккан өрттүн себебин иликтеп жатканын бүгүн “Азаттык” радиосуна облустук ички иштер башкармалыгынын басма сөз катчысы Сталбек Усубакунов билдирген.

Анын айтымында, 3-январда түнкү саат 1ге жакын баптисттик багытты карманган жарандардын сыйынуу үйүндө белгисиз себептерден улам өрт чыкканы тууралуу кабар келип түшкөн.

Кырсыктын себеби экспертизанын жыйынтыгы чыкканда белгилүү болот. Каза болгондор жана өрттөн жабыркагандар жок.

Сыйынуу үйүнүн кароолчусунун айтымында, окуя түнкү 1де болгондуктан имараттын ичинде эч ким жок болчу. (AiA)