Чехия орус хакерин АКШга экстрадиция кылды
Вашингтон да, Москва да өткөрүп алууну каалаган Евгений Никулин АКШга депортация болгонун бүгүн Чехиянын Юстиция министрлиги ырастады.
Ал америкалык ири интернет компанияларга, анын ичинде LinkedIn жана Dropbox компанияларына хакерлик жасап, компьютерлерге кирип, жеке маалыматтарды уурдаганы үчүн айыпталган. Эгер күнөөлүү деп табылса, АКШда отуз жылга чейин түрмөгө кесилиши мүмкүн.
Никулин 2016-жылдын октябрь айында Чехияда камакка алынгандан кийин аны өткөрүп алуу өтүнүчүн расмий Прагага АКШдан соң Орусия да жолдогон.
Орусияда ал, маалыматтарга караганда, 2009-жылы Интернет аркылуу 2000 доллардын уурдалышына катышы бар деп айыпталган.
Хакер деп шектелген орус жараны камакка алынганда аны кармоо АКШнын Федералдык тергөө бюросу – ФБР менен кызматташтыкта жүргүзүлгөнүн чех полициясы жарыялаган.
Апта башында Чехиядагы сапары учурунда АКШ Конгрессинин Эл өкүлдөр палатасынын спикери Пол Райан Никулинди “Америкага экстрадиция кылууну күтүп жатышканын” билдирген. (UE)