Украина карыздын айынан кайрадан жардам сурайт

Украина чет өлкөлөрдүн же каржы институттарынын жардамына муктаж экенин өлкө президенти Петро Порошенко билдирди.

"Эгер мурдагы карызыбызды төлөөгө туура келбесе сырттан каражат албайт элек", - деди Порошенко 14-сентябрда, Ялта-Европа Стратегиясы форуму учурунда.

Президенттин айтымында, Украинанын тышкы карызы 2010-жылга чейин 26 млрд. доллар болсо, андан кийинки Виктор Янукович башкарган төрт жылда дагы 20 млрд. долларга өскөн.

"Аны биз төлөйбүз. Мамлекеттик карызды төлөөнүн жогорку чеги кийинки жылга туура келет", - деди Порошенко.

Андан мурдараак эле украин президентинин парламенттеги өкүлү Ирина Луценко Эл аралык валюта корунан жардам алуу үчүн жаңы сүйлөшүү башталганын билдирген.

2014-жылкы бийлик алмашуудан кийин Украина эл аралык институттардан жардам алып келген. Ушу тапта Эл аралык валюта корунан 17,5 млрд. доллар алууга келишими бар.