Порошенко БУУну Орусиянын агрессиясын токтотууга чакырды
Порошенконун айтымында, Орусиянын “агрессивдүү экспанционисттик саясатын” дүйнө өлкөлөрү бирге болмоюнча эч ким токтото албайт. Украин президенти ага катар “экспанционизмге” каршы туруу БУУнун миссиясынын бир бөлүгү экенин да эске салды.
Москва Порошенконун БУУдагы сөзүнө дароо жооп кайтарган жок. Украин президенти Улуттар Уюмундагы башка форумда өлкөсүнө БУУнун тынчтык орнотуучү миссиясын жөнөтүү чакырыгын дагы кайталап, бул Украинанын “суверенитетин жана аймактык бүтүндүгүн” калыбына келтирүүгө салым кошорун белгилеген.
Расмий Киевдин Украинга БУУнун тынчтык орнотуучу күчтөрүн жөнөтүү өтүнүчүнө Коопсуздук кеңешинде вето салуу укугуна ээ Орусия такай каршы чыгып жүрөт. Москва Украинага БУУдан ЕККУнун байкоочуларынын коопсуздугун коргой турган гана чакан аскерий миссия келиши керек деп эсептейт.
2014-жылдын жазында Крымды аннексиялап алган Орусия Украина чыгышындагы куралдуу жаңжалга тикелей катышы барын такай четке кагат. Андан бери Украина чыгышында өкмөттүк күчтөр менен орусиячыл жикчилдер ортосундагы кагылыштардан 10 миң 300дөн ашуун кишинин өмүрү кыйылды. (UE)