Индонезиядагы зилзала жана цунаминин курмандыктары өсүүдө
"Reuters" агенттигинин өлкө бийликтерине таянып маалымдашынча, аралдагы Палу шаарында 420 адам каза болгону аныкталды. Табигый кырсыктан каза болгон жана жабыркагандардын саны дагы өсүшү мүмкүн экени кабарланды. Азыркы тапта алыскы аймактардагы жабыркагандар тууралуу маалыматтар келип түшө элек. Палу шаарындагы талкаланган имараттардын алдында ондогон адамдар калышы мүмкүн. Жүздөгөн адамдар жараат алды. 10 миң адам үй-жайдан ажырады.
Күбөлөрдүн айтымында, бийиктиги алты метрге жеткен цунами шаарды каптаган.
Кырсык тууралуу алдын-ала маалымдабаганы үчүн Индонезиянын Гидрометеориялык агенттигине сындар айтылууда. Агенттик ишембиде жер титирөө жөнүндө эскертүү таратып, бирок жарым саат өтпөй эч кандай коркунуч жок экенин кабарлаган.