Бишкектеги Ботаникалык бактын 80 жылдыгы белгиленүүдө
Бактын жетекчисинин милдетин аткарып жаткан Гүлайым Донбаеванын айтымында, быйыл март айында Ботаникалык бакты жаңылоо жана калыбына келтирүү боюнча башкы план бекитилген. Ушул пландын негизинде бакчанын аймагындагы дарактардын жана өсүмдүктөрдүн түрүн көбөйтүп, иретке келтирүү каралууда.
Ботаникалык бак 1938-жылы түзүлгөн. Ичиндеги өсүмдүктүн көп түрдүүлүгү боюнча Борбор Азия өлкөлөрүнүн ичинен биринчи орунду ээлейт жана эл аралык Ботаникалык бакчалар ассоциациясына мүчө. Ушул тапта бактын аянты 124 гектарды түзөт. Шаар тургундарына анын 36 гектар жеринде сейилдөөгө уруксат берилген.
Акыркы жылдары Ботиникалык бактын каралбай калганы боюнча маселе көтөрүлүп, бир катар коомдук уюмдар бул жаатта иш алпарып келет.
2011-жылы бактын аймагына канадалык биолаборатория куруу пландалып, бул үчүн төрт гектар жер бөлүнгөн. Бирок кийин экологдор жана жарандык коом каршы чыгып, президенттин кийлигишүсү менен ал курулбай калган.(BkA)