Тереза Мэй Брекзитти 30-июнга калтырууну суранды
Премьер-министр Тереза Мэй Британиянын Евробиримдиктен чыгуусун 30-июнга чейин узартууну өтүндү. Мэйдин колу коюлган кат Европа кеңешинин төрагасы Дональд Тускка жиберилди.
Документте Мэй Брекзит маселесин чечүүнү андан ары кечеңдетпей турганы айтылат. Британ өкмөт башчысы Брекзит боюнча Евробиримдик менен макулдашуунун долбоорун үчүнчү жолу парламенттин кароосуна алып барууга камынып жатканын билдирген.
“Reuters” агенттиги Туск Лондондун катын алганын кабарлады.
Лондон 29-мартка чейин Евробиримдиктен кайсы жол менен чыгып кетүүнү чечиши керек. Бирок британ мыйзам чыгаруучулары Мэйдин өкмөтү даярдаган келишимдин долбоорун четке каккан. Парламент Евробиримдиктен макулдашуусуз чыгууга каршы добуш берип, Брекзиттин мөөнөтүн жылдырууну жактырган.
2016-жылы 23-июндагы референдумда британдардын 52% биримдиктен чыгууну колдогон. Бул чечимди жактагандардын максаты Евробиримдик эрежелерине байланбаган, өз алдынча саясат жүргүзүү, анын ичинде сооданы, каражатты өзү башкаруу эле.