Оштун мэри коронавируска кабылган дарыгерлер менен сүйлөштү
Мэр ошондой эле Оштогу балдардын инфекциялык ооруканасында иштеген дарыгерлердин вирусту жуктурганы тууралуу окуя атайын комиссиянын иликтөөсүндө экенин билдирди.
Мындан тышкары вируска кабылган дарыгерлерди карап жаткан медицина кызматкерлери менен да сүйлөшүп, кандай жардам керек болсо түз кайрылышса болорун айтты. Бул тууралуу Ош шаар мэриясынын басма сөз катчысы Азамат Абсаттаров "Азаттыкка" билдирди.
Ош шаарындагы балдардын жугуштуу оорулар ооруканасынын 20 чакты кызматкери COVID-19 вирусун жуктуруп алган деген күмөн менен обсервацияда жатат. Эки дарыгер коронавирус жуктуруп алганы аныкталып, ооруканада. 8-апрелде вице-премьер-министр Кубатбек Боронов алар ооруну ажы тойдон жуктуруп келип, башка кесиптештерине да жуктурганы маалым болгонун айткан. Дарыгерлер муну кескин четке кагып, оору Оштогу умрадан кайтып келип, коронавируска шектелип, обсервацияга жаткандар менен байланыш учурунда жукканын айтып чыгышкан. Бул маселе учурда Саламаттык сактоо министрлиги тарабынан атайын инспекциялык топтун иликтөөсүндө.
10-апрелдеги маалыматтарга ылайык, Кыргызстанда коронавирус илдетин жуктуруп алган дарыгерлердин саны 39 :
• Бишкекте – 8
• Чүй - 1
• Ош облусунда – 21
• Жалал-Абад облусунда – 8
• Баткен облусунда – 1 дарыгер коронавирус илдетин жуктуруп алган. (ZKo)