ТИМ: Новосибирскиден жарандарды алып келүү макулдашылды
Кыргызстандын Тышкы иштер министрлиги Новосибирск-Бишкек каттамы боюнча буга чейин авиабилеттерди сатып алган кыргызстандыктарды алып келүү маселеси сүйлөшүлгөнүн маалымдады. Бирок канча жаран алынып келери айтылган жок.
Тышкы саясат мекемесинин маалыматына ылайык, 22-апрелде Орусия мамлекети Кыргызстандагы өз жарандарын алып кетүүнү пландап жатат. Кыргызстан ошол учак келатканда Новосибирск шаарындагы мекендештерди ала кетери макулдашылды.
ТИМ Новосибирскиде мекенине кайта албай тургандардын ичинен өзгөчө жардамга муктаждар тамак-аш, жаткан жери менен камсыздалганын билдирди. Бирок соцтармактардагылар Орусиядагы мекенине кайтууну чечкен мекендештер кыйын күнгө кабылганын, тамак-ашка акчасы калбай баратканын жазып жатышат.
Ушул күндөрү чет өлкөлөрдөн, айрыкча Түркия менен Орусиядан жүздөгөн кыргызстандыктар мекенине кайта албай турушат. (TSh)