Кривична пријава против поранешниот градоначалник на Ново Село

Поранешниот градоначалник на општина Ново Село (Б.В.) доби кривична пријава за злоупотреба на службената положба и овластување за склучување анекс кон договор за закуп на времен објект, со кој го продолжил рокот за времетраење од 5 на 11 години, информираат од МВР.

Оттаму наведуваат дека тој пред истекувањето на договорот за закуп на времен објект на Смоларскиот водопад склучен меѓу општина Ново Село и правно лице од Струмица, без спроведување на јавно наддавање и јавен оглас за издавање под закуп на објект, со анекс му го продолжил користењето на објектот на правното лице, со што дозволил преуредување на постоечкиот објект во национален ресторан и изградба на неделиви објекти од тврда градба, спротивно на потпишаниот договор.

На тој начин тој овозможил правното лице, Друштво за туризам, угостителство и услуги од Струмица, да биде во повластена положба на пазарот и со поголема имотна корист во подолг временски период.