Северна и Јужна Кореја се заложија за денуклеаризација на Полуостровот

Лидерите на Северна и Јужна Кореја ги завршија последните од серијата историски посети, истакнувајќи дека се согласиле да извршат притисок за отстранување на нуклеарното оружје од Корејскиот Полуостров.


На денешна прес-конференција во Пјонгјанг, лидерот на Северна Кореја Ким Џонг Ун изјави дека во блиска иднина ќе патува во Јужна Кореја. Ако тоа се случи, ќе биде прва посета на лидер на Северна Кореја, откако Полуостровот беше поделен пред неколку децении.


Во меѓувреме, претседателот на Јужна Кореја Мун Џае Ин изјави дека тој и Ким се согласиле да се демонтира локацијата за тестирање на ракети, рампата за тестирање, и да бидат дозволени инспекции.


Деталите од договорот објавен за новинарите покажува дека двајцата лидери се согласиле за разоружување на заеднички контролираното гранично село, вклучително со отстранување и на мините. Исто така договорено е да бидат повлечени 11 стражарски позиции од т.н. Демилитаризирана зона, која ги раздвојува двете земји.


Двајцата лидери исто така се договориле да се обидат да бидат заеднички домаќини на Летните олимписки игри во 2032 година, со што ќе биде прв пат две земји да бидат домаќини на Олимписки игри.


Ова беше трета средба оваа година меѓу Мун и Ким. Претходно, министрите за одбрана на двете земји потпишаа договор за намалување на тензиите на Полуостровот.