ОН: Расте бројот на цивили жртви во источна Украина

Обединетите нации предупредија дека во изминатите три месеци се зголемува бројот на цивили убиени во судирите во источна Украина. Се смета дека во украинскиот конфликт досега биле убиени над 10.000 луѓе, а најмногу од жртвите загинале во првата година на конфликтот, од 2014 до 2015 година, по што беше договорен прекин на огнот. Но, од средината на мај до средината на август биле убиени 12 цивили, а 93-ца биле ранети. Ова е за една третина повеќе од бројот на жртви во претходниот трисемечен период.

Проруските сепаратисти контролираат делови од источна Украина, околу градовите Луханск и Донецк, додека украинските сили се обидуваат да го спречат нивното ширење кон запад или кон брегот на Азовско Море.